Shillong K’Lyngkot 19 : Ka Dorbar Shnong Mawlynnong ha ka sngi Saitjaiñ ka la pynieng da ki mawsahnam ryngkat ka kyrteng jong kito kiba la prat lynti ban kyntiew ïa kane ka shnong kum kawei na ki jaka jngohkai pyrthei kaba pawnam tam ha ka Ri bad ha ka pyrthei hi baroh kawei.
Ki kyrteng kiba ka Dorbar Shnong Mawlynnong ka buh da ki mawsahnam ki kynthup ïa ka kyrteng u Bah DD Laloo, u Myntri Sorkar barim ka jylla u (L) RG Lyngdoh, u Symbud Myntri Rangbah ka Jylla Bah Prestone Tynsong, ka Kur Kharrymba kaba la ai sngewbha ïa ka jaka bad ka Tourism Forum Leaders jong ka Shnong kiba la maitphang bad prat lynti ban kyntiew ïa ka shnong Mawlynnong kum ka jaka jngohkai kaba pawnam.
La ong ruh ba ka jingbuh ïa kine ki mawsahnam ka long da ka jingthmu ba ki pateng ban dang wan bad ki briew kiba leit sha kane ka shnong kin tip kumno la pynwandur ïa ka kam jngohkai ha kane ka shnong da kitei ki nongprat lynti.
Ïa kine ki mawsahnam la plie da u Symbud Myntri Rangbah ka jylla u Bah Prestone Tynsong kum u Kongsan, ka Myntri barim ka jylla ka Kong Ampareen Lyngdoh kum ka Symbud Kongsan, ha kaba la ïa donlang u Bah DD Laloo, ka Kong Patricia Mukhim, ki nongshong shnong, ka San Shnong Youth Organization Upper Shillong bad kiwei kiwei.
Haba kren ha ka jingïalang u Bah Prestone ula ai ka jingïaroh ïa ki rangbah bad baroh kiba don bynta kiba la trei borbah ban pynkylla ïa ka dur jong ka shnong Mawlynnong kum ka shnong kaba khuid tam ha dewbah Asia.
Ha kajuh ka por u la kyntu ïa baroh ba kidei ban ïai bteng ban pynneh ïa kane ka jingkhuid suba bad ruh ban kyntiew ïa ka kam jngohkai ha kane ka thain.
Lah ban kdew hangne ba ka Mawlynnong ka dei kawei na ki shnong kaba khuid tam ym tang ha ka ri hynrei ha ka dewbah Asia bad dei na kane ka daw kaba pynlong ia bun bha ki nongwan jngohkai pyrthei ba kin pynlut por ban wan jngoh khnang ia kane ka shnong.
