SHILLONG, Kyllalyngkot 19: Ka Shillong Cricket Association (SCA), hapoh ka jingïalam jong u President-Bah Peter McDonald K.sawian, ka la ïoh ban pynkup burom ïa u President ba thymmai jong ka Meghalaya Cricket Association MCA, u James K Sangma ha ka jingïalang ba lyngkot hynne ka sngi Nyngkong (19 tarik Kyllalyngkot).
Ïa kane ka jingïalang la pynlong ha ophis treikam jong ka SCA, ha Polo bad la pynïaid ïa ka da u Bah Mackie Blah-Treasurer ka SCA. Nalor u President, kiwei de ki dkhot nongkitkam jong ka SCA kiba la don ryngkat lang ki kynthup ïa u Vice President-Bah Alexander Lynser, Secretary bah Banri Kharmalki nangta u Bah Eugene K. Syntiew-Asst.Secratery lem bad kiwei kiwei ki dkhot nongkitkam jong ka seng.
U James K Sangma u la shimti ïa ka kam na u Nababrata Bhattacharjee, hadien ba u la shah jied kum u President ba thymmai jong ka MCA ha ka elekshon ba la long ha u bnai ba ladep. Yn kyrshan lang ïa u James K Sangma da u Vice-President ba la jied thymmai Bah Rajiv Bareh, katba u Rayonald Kharkamni u la wanphai biang kum u Honorary Secretary. U Honorary Joint Secretary udei u Mebanphira Swer, Honorary Treasurer Eddystone Shylla bad Apex Council Member Chuba R Marak.
Haba ai jingkren na ka liang jong u James K Sangma u la pynpaw ka jingsngewnguh ïa ka SCA kaba la pynlong ïa kane ka jingpynkup burom bad u la kular ïa ka jingïatreilang ha ka jingpyrshang jong ka seng ban kyntiew ïa ka kriket Meghalaya sha ki kyrdan ba kham shalor.
“Kane ka sngew kum ka jingkitkhlieh kaba khia hynrei Nga khmihlynti ïa ka jingkyrshan na baroh ki briew kiba ïadon bynta lang ha ka kriket Meghalaya,” la ong u James Sangma, da kaba kdew ruh ba ka jingïalehkai kriket ha Meghalaya ka dang shaniah ïa ka bynta jong ki Association, la ka long jong ki District lane ka Shillong CA.
Shuh shuh u la bynrap ba ka Shillong Cricket Association ym tang ba kadei ka synjuk kriket kaba la rim tam ha ka thaiñ shatei lammihngi, hynrei kadei ka synjuk kaba ju treikam, khlem da klet ïa kiwei pat ki District Association, kiba la noh synñiang sha ka jingroi jong ka kriket hapoh ka jylla.
“Na ka bynta jong nga kum u President jong ka MCA, nga ngeit skhem ba dei tang ha ka jingroi bad ka jinglah ban pyntyllun ïa ki kam jong ki Association ba ngin sa ïohi ïa ki jingkylla kiba ïaid shakhmat. Na kata ka daw ka jingthmu ba kongsan katba nga nang ïaid shakhmat ha ka kam kum u President ka long ban peit kumno ngin lah ban ïatreilang bad baroh ki District,” u la ong.
“Nga pynthikna ïa phi iwei pa iwei ba ngan ai ïa ka 100 percent bad ngan shim ïa ka jingai jingmut bad jingkyrshan jong phi katba ngi nang iaid shakhmat. Dei tang ka jingïatreilang ba ngin lah ban pynlong ym tang ïa ka MCA, hynrei ïa baroh ki District bad kiwei kiwei ki synjuk kriket, kiba kham khlaiñ kiba don jingmut bad kiba treikam”.
Ka Shillong Cricket Association kadei kawei na ki synjuk kriket kaba rim tam ha ka thaiñ shatei lammihngi bad kaba treikam da kaba pynlong ïa ki lympung ïalehkai ha ki Division bapher bapher man la u snem. Ki katto katne ki lympung jong ka SCA kiba dang ïaid mynta ki long ha ka Third (C) Division kaba la jam sha ka Semi final, ka Second (B) Division bad ka First Division kiba dang ïaid group stage.
