Ka thup kyrteng jong ka kynhun Meghalaya na ka bynta ka Santosh Trophy 2025-26:
Rajat Paul Lyngdoh, Banshanskhem Kharsyntiew, Nister Roy Suting, Wanboklang Lyngkhoi, Apborlang Kurbah, Wilbert D Marbaniang, Iohborlang L Lyngkhoi, Mebanaibok Kharbudnah, Richie Kharbani, Mebankhraw K Wahlang, Rimankhraw Kharumnuid, Riborlang L Lyngkhoi, Babysunday Marngar, Dibormi Kassar, Mebanshngain Kurkalang, Fairming Suting, Robertson M Khongriah, Hardy Cliff Nongbri, Kynsaibor Lhuid, Marbiangki Suchiang, Deibormame Tongper, Dawanchwa C Challam
Support staff:
Khlain Pyrkhat Syiemlieh (Head Coach), Sailon Syngkrem (Assistant Coach), Dious Lapasam (Manager), Wanbokstar Syiemiong (Physio)
Shillong, Kyllalyngkot 18: Ka kynhun ïalehkai phutbol jong ka jylla Meghalaya kan sa hiar ban leit sha Silapathar ha Assam ha kane ka sngi Nyngkong katba ka dang pynkhreh ban sdang ïa ka jingïakhun jong ka Group B ha ka lympung 79th Senior Men’s National Football Championship na ka bynta ka Santosh Trophy 2025-26.
Ka Meghalaya kan ïalehkai ïa ka jingïalehkai ba nyngkong ha ka 22 tarik Kyllalyngkot pyrshah ïa ka Odisha. Ka kynhun ka la ïoh ban pynlong ïa ka jingïalang kitbok kaba lyngkot ha ka sngi Thohdieng ha madan MFA Ground ha Polo, ha kaba u President ka MFA u Bah Hamletson Dohling u la don lang ryngkat bad kiwei pat ki dkhot ba rangbah jong ka synjuk ban ai ïa ki kyntien ai mynsiem ïa ka kynhun.
U Bah Khlain Pyrkhat Syiemlieh un dang bteng ban ïalam ïa kane ka kynhun kaba la ïohi shibun ki jingkylla naduh ba ka Meghalaya ka la ïohrung na ka wat ïakhun ba nyngkong (preliminary stage) ha u bnai ba la dep. Ki la don katto katne ki nongïalehkai ki bym shym la don shuh namar ki jingïateh bad ki klob bad kiwei kiwei ki daw hynrei kaba kham bha ka long ba ka kynhun ka la ïoh por bha ban pynkhreh hapoh ka jingpeitngor jong u coach.
Ka Assam, ka jylla kaba pdiang ïa ki jingïalehkai, ka West Bengal kaba bat ïa ka nam lahduh, ka Tamil Nadu, ka Uttarakhand, ka Nagaland bad ka Rajasthan ki la shah kynthup ha ka Group A.
Ka Meghalaya, ka Odisha, ka Kerala, ka Services, ka Punjab bad ka Railways ki la shah pynïasoh ha ka Group B. Ka Kerala kadei ka kynhun kaba wan ba ar (runners-up) ha u snem ba ladep bad ka la jop ïa ka nam lahduh la katto katne sien, ka sien ba khatduh kadei ha ka samoi 2021-22. Ha kajuh ka por ka Services, ka la long lahduh dang shen ha u snem 2023-24 bad dei ma ka kaba la pynkhyllem ïa ka Meghalaya ha ka Quarterfinal ha ka samoi ba ladep.
Ka Punjab ka hap ban phai biang kham shadien ha ki por ba la dep sha ka sien kaba khatduh ba ka la long ka nongjop – 2007-08 – hynrei ka la wan ba-ar ha ki lai snem naduh katei ka por. Ka long pat kaba kham slem shuh shuh na ka bynta ka Railways – kaba hap ban phaidien haduh 60 snem naduh ba ki la rah khatduh ïa ka khusnam – hynrei ki la wan kyrdan ba ar dang ha u snem 2013-14.
Dei tang ka Meghalaya bad ka Odisha ki bym pat ju jop ïa ka nam lahduh hynrei ka jingïalehkai kaba bha tam jong ka Meghalaya ka la wan ha u snem 2022-23 ha kaba ki la shah pynliem noh ha ka phainal da 3-2 da ka Karnataka.
Saw tylli ki kynhun na kawei pa kawei ka Group kin ïohrung sha ka QuarterFinal bad kane kan long ka thong ba nyngkong jong ka Meghalaya. Watla ki nongïalehkai kin kyrmen ban jam shakhmat hynrei ka kynhun kan hap ban shim kawei ka sienjam hadien kawei pat.