Shillong, K’Lyngkot 17: Kum shi bynta ban pynsted ïa ki kam kiba la sdang trei hapoh ka Constituency u MLA ka 19 South Shillong uba dei ruh u Myntri Sorkar u Bah Sanbor Shullai mynta ka sngi u la leit ban jurip ha Madan Laban ïa ka jingshna pynheh surok bad kumjuh ruh ia ka madan ialehkai football kaba la twa ka kynroh.
Ha kane ka jingleit ban jurip ïa u Bah Sanbor la synran lang da ki ophisar ka tnad PWD, ki ophisar na ka tnad Water Resource bad kumjuh ruh na ka tnad Sport h aka jingdon lang ruh ki nongïalam shnong ba kynthup naduh u Rangbah Shnong bad kiwei kiwei de.
La sdang ïa ka jingjurip ha kaba ïadei bad ka surok ïa kaba la shna pynheh naduh ka khyrdop jong ka raid Laban college haduh ha pom muit hajan ka Nepali School namar ba ha kane ka bynta jong ka surok ka khim palat bad jynjar ruh ban ïa pass kali.
Ha kane ka jingleit ban jurip u Bah Sanbor u la sakhi hi da la ki jong ki khmat ïa ka jingïaid shaphrang jong ka kam bad la ïohi ruh ba ïa ki nar post electric kiba wit haba pynheh surok la pynkynriah sha ki jaka ba lait.
Ha kane u Bah Sanbor u la jurip sa ïa ka kynroh ba twa jong ka madan football kaba la twa ha kane ka lyiur namar ka jingther palat u slap kane ka kynroh ba skhem ruh ka twa noh.
Haba kren sha ki lad pathai khubor hadien ka jingjurip u Bah Sanbor Shullai u la ong na ka tnad sport bad PWD la mang pisa haduh 11 klur 23 lak kaba kynthup ïa ka jingshna pynheh ïa ka surok ka long 4 klur duna katba ha kaba ïadei bad ka madan phlang plastic ka long 6 klur nalor kiwei kiwei de.
Shuh shuh u Bah Sanbor u la ïathuh ban lait twa biang ha kane ka jaka kaba twa ka kynroh yn shna noh da ka check dam bad kane ka mang tyngka ka long kumba 2 klur duna bad ka um ba pynlang kan bsa ïa baroh ki shnong kiba don hapoh u pud u sam jong ka Raid Laban.
U Bah Sanbor u la ong ba tang shu dep kine ki project kan sa kylla long kaba itynnad bha bad khamtam eh ha kaba iadei bad ka surok kan ïada shibun eh ïa ki khynnah skul kiba ju iaid man ka sngi na kane ka surok.
“Nga hap ban shim khia hi namar ba hap shim kabu ïa ka mariang namar ba ka la dei ka por trei bad ban pynsted ïa ka kam namar lada jur u slap kan sa jynjar ban pyntrei bad ïa kine ki jingtrei dei ban pyndep ha ka por bala buh,” ong u Bah Sanbor.
