U dei u nongïalam u nongïalap bad u nongïada, sngewlem u Bah Sanbor ba khlad u Rev. R.R. Cunville

Shillong, K’Lyngkot 17 : U Myntri ka tnad Arts and Culture ka sorkar jylla bad MLA ka Shillong South Bah Sanbor Shullai u la phah ka jingsngewlem halor ka jingkhlad noh jong u nongialap ba pawnam u Rev. Dr.RR Cunville ha ka 17tarik mynta u bnai.
Ha ka kyrwoh u Bah Sanbor u la ong, “Ka long ka khubor kaba sngewsih ban tip halor ka jingkhlad kyndit u Rev. Dr.RR Cunville uba dei u nongialap niam, u Nongialam bad u nongiada ha ka imlang sahlang.”
Shuh shuh u la ong ruh ba u Pastor Cunville u dei u nongkren bad u nongialap uba shlur. La kdew ruh ia ka jingnoh synniang jong u ha ka imlang sahlang bad khamtam u nongiada jong ki duk ki suk bad kiba tlot.
“Ka dei ka jingshisha ba ka jingiap ka pynpang ia ka mynsiem bad eh ban khiah pat. Hynrei ka jingieid ka neh junom bad yn ym don shuh mano ruh ba lah ban tuh. Ka pynpang shisha ia ka mynsiem jongngi ban duh ïaphi…,” bynrap shuh shuh ka kyrwoh
Nalorkata u ong ruh ba na ka ïing bad ka constituency ki phah ka jingsngewlem sha ki bahaiing hasem halor kane ka jingduh.