Rung Quarter final ka Shibakha bad ka Shillong Sixers ha ka SCA Cricket League 3rd Division 2026
SHILLONG, Kyllalyngkot 12: Ka Shibakha CC bad ka Shillong Sixers ki la jam sha ka Quarter final ha ka lympung Shillong Cricket League 3rd Division 2026 jong ka Shillong Cricket Association. Kane la pynthikna hadien ba ki la jop ïa la ki jong ki jingïalehkai Pre Quarter final kiba la long hynne ka sngi Nyngkong.
Ka Shibakha CC ka la lah ban pynliem noh da tang 1 ron ïa ka Slog Warriors, katba ka Shillong Sixers ka la jop da 6 ron ïa ka Youth Stars.
Ha ka Pre Quarter ba nyngkong, ka Slog Warriors ka la aiti ïa ka Shibakha ba kan tied nyngkong hadien ba jop ïa ka jingkynting pisa (toss). Ka Shibakha ka la lah ban kamai 131 ron bad hap 7 wiket haduh kaba kut jong ka 20 ober. Kiba kham kongsan ha ka tied na ka bynta ka Shibakha ki long u Means Machine (32 ron naki 17 bol) bad u Khambor (41 ron naki 50 bol).
Watla kadei ka thong kaba duna hynrei ki rangkawang bol ka Shibakha ki la pyndep ïa ka kamram jong ki ha ka boling, da kaba pynkhyllem ïa baroh 10 ngut ki nongtied ka Slog Warriors tang na ka bynta 130 haki 20 ober, ban jop da tang 1 ron ïa ka jingïakhun.
U Mean Machine, nalor ba u la lehkai bha ha ka tied, u la tyngshaiñ ruh ha ka boling da kaba khur 3/33 naki 4 ober, kaba la pynlong ïa u ban khur ïa ka nam Player of the Match. U Ben Mowthoh udei uwei pat u rangkawang bol ka Shibakha uba la seisoh ha ka boling, da kaba khur 2/15 naki 4 ober.
Ha ka jingïakhun Pre Quarter kaba bud, ka Shillong Sixers ka la kam trai ban tied nyngkong hadien ba jop ïa ka jingkynting pisa (toss) ban buh ïa ka thong kaba 195 ron haki 20 ober. U Sandeep Roy (61 ron naki 31 bol) bad u Fernandes Bareh (61 ron naki 46 bol) kidei ki nongtied kiba la kamai bun ron tam ïa ka kynhun.
Haba pyrshang ban jubab ka Youth Stars ka la duna noh da tang 6 ron ban poi sha ka thong, ha kaba ka la kamai 189 ron bad hap 8 wiket haki 20 ober. Kiba la kamai bun ron ki long u Mrinmoy Das (53 ron naki 30 bol) bad u Kunal Chakroborty (39 ron naki 30 bol).
Napdeng ki rangkawang bol ka Shillong sixers, kiba la seisoh ki long u Evert Mawlong (khur 3/31 naki 4 ober) bad u Amit Singh (2/28 naki 3 ober), hynrei ïa ka nam Player of the Match la khur da u Sandeep Roy, uba la kamai 61 ron ha ka tied bad khur 1 wiket ha ka boling.