Nongstoiñ, K’lyngkot 11 : Kumba saw snem mynshuwa ka sorkar ka la dep ban shna ïa ka sub health centre ha ka shnong Langpih hynrei haduh mynta ym shym pat la lah ban plie ïa ka.
Ha kine ki khyndiat sngi ba la dep u nongthohkhubor u la hiar sha katei ka shnong ban peit ïa ka jinglong jiangman bad ka shong suk shong saiñ ha kaba la lap ba katei ka jaka sumar kaba don ha katei ka shnong ka la sop da ki sañium bad ki ñiut ki ñier baroh sawdong bad la ikumba katei ka jaka sumar ka dei pynban ka jaka rieh jong ki riew sniew ha ka por mynmiet. Haba ïakren bad twad jingmut na ki nongshong shnong ha Langpih halor ka jing bym pat lah jong ka sorkar haduh mynta ban plie ïa katei ka jaka sumar don na ki kiba ong ba ka jingpynslem jong ka sorkar ban plie ïa katei ka jaka sumar ka lah ban dei namar ka jing duna nongtrei.
Don pat kiba ong ba ka lah ban dei na ka jing bym pat lah jong ki trai khyndew ban pynbiang ïa ki kot ki sla kiba ïadei bad ka jaka ba la shna ï katei ka jaka sumar.
Na ka liang ki riew rangbah bad ki long kmie jong katei ka thaiñ pat ki la ong ba ka jingpynslem jong ka sorkar ban plie ïa katei ka jaka sumar ka pynjynjar ïa ki ba pang ba shitom kiba don kam ban leit wad dawai namar la da leit haduh Nonglang PHC ka la jngai bad ki jingpang jing shitom kiba tang malu mala kiba lah ban sumar ha ka sub health cntre la hap ban leit sha jngai.
Nalor kata ki la ong ba lada ka sorkar ka la ple ïa katei ka jaka sumar bad ka la pynbiang ïa ki nongtrei kan pynsuk shibun ïa ki longkmie kiba armet ban leit phah checkup man la ka sngi.
Ha kajuh ka por kitei ki rangbah bad ki longkmie ki la kyntu ïa ka sorkar ba lada long kaba lah ka dei ban plie bad pynbiang noh ïa ki nongtrei ha katei ka jaka sumar khnang ba kan pynsuk ïa ki paitbah.
