Shillong, K’Lyngkot 11 : U Nongïalam ka BJP ba dei ruh u MLA ka Pynthorumkhrah Bah AL Hek u la ong ba ka jingjied ïa ki kyrtong MDC ha kane ka elekshon kaban sa long shen ha Garo Hills Autonomous District Council (GHADC) kan dei beit da kaba peit ïa kito ki kyrtong kiba kham don ka jingkyrmen ban jop.
Haba kren bad ki lad pathai khubor dang shen, u Bah AL Hek u la ong ruh baka party ka kham pynleit jingmut ha ka jingsei ïa ki kyrtong kiba kynsai ban ïa kaba pynbun ki kyrtong kiba ym ïahap.
Katkum ka jingong jong u, ka party hi kan sa rai ïa ka jingdon ki kyrtong kiba kan sei ha kane ka elekshon kata ruh da kaba peit bad bishar bniah shwa ïa ka jingdon ki kyrtong kiba kynsai bad kiba kham don ka kabu ban jop.
Shuh shuh u la banjur ruh ïa ka jingdonkam jongka party ban ïoh buit na ki jingbakla kiba la dep ha ki elekshon kiba ha shwa bad ban kham pynleit jingmut pat ha ka jingbishar bniah ïa ki kyrtong naduh tynrai.
“Ngi dei ban long kiba husiar namar ngi hap ban da bishar bniah bha khnang ban pyntikna ba kito kiba aireng kin dei beit ki kyrtong kiba ïakhun ban jop bad baroh ki kyrtong na kiwei pat ki party;,” u la ong.
La ïathuh ruh ba ka party mynta ka dang pynlong ïa ka jingsorjamin bad ban pynkhlain ïa ki ktem treikam khnang ban ïoh ïa ka jingshaniah jong ki paidbah ka thain.
“Ngi dang pynlong mynta ïa ka jingsorjamin bad ha kajuh ka por ruh ban pynrung dkhot na ka bynta ban pynkhlaiñ shuh shuh ïa ka jingtreikam jong ka party,” la bynrap shuh shuh u Bah AL Hek.
