1. Lumparing vs Mawkasiang
2. Laitkor vs Umrynjah
3.NongrimHills vs Kharang
Shillong, K’Lyngkot 10 : Ka Pay For Right Football Academy ka la bteng ïa ka jingjop ba khlem sangeh ha ka lympung ïalehkai SSA Women’s Football League 2026 sha ka lai sien lynter da kaba pynliem noh da shi (1-0) ïa ka Lawei SC ha ka sngi Saitjaiñ ha madan First ground-SSA Stadium, Polo.
Kane ka jingjop ka la pynthikna ruh ïa ka PFR FA ban ïoh jaka ha ka Quarter Final jong kane ka lympung ba la pynlong da ka Shillong Sports Association, da kaba kamai 9 point pura naki lai sien ïakhun bad ban wan kyrdan ba nyngkong ha ka Group-B.
Ïa kane ka shikol jong ka PFR FA la thep da ka Aitihun Majaw ha ka minit kaba 56.
Hadien kane, ka jingïalehkai hapdeng ka Mawkasiang SC bad ka Lawsohtun SC ka la kut ha ka jingïakhaid khlem don ba lah ban pynkhihjar. Kane ka la pynlong ïa kine ki arliang mamla ban khur ïa ka shi point ba nyngkong ha ka Group-B watla ki la mad nam rem ha ki ar tylli ki jingïalehkai ba sdang.
Kham mynshwa, ka SSA Women’s League ka la sakhi ïa ka jingjop kaba bun kol tam ha ka sngi Thohdieng ha kaba ka Lumparing SC ka la pynbam haduh 16-0 kol ïa ka Lawsohtun SC ban pynjlan ïa ka jingjop sha ka ar sien lynter ha ka Group-B.
Ka Juviality Lyngdoh (9′, 26′, 29′, 54′) bad ka Catherine Kharkongor (40′, 52′, 64′, 68′) ki la ïoh ban thep mar saw kol.
Kiwei pat kiba la pynkhihjar ha kane ka jingïalehkai ki long ka Bahunlang Synrem (20′), ka Savinity Jyndiang (35′), ka Iaphisha Marbaniang (37′, 57′), ka Lakyntiew Dohling (60′, 62′) bad ka Banyllashisha Nongkhlaw (66′). Katba kawei ka kol kadei ba la kum thep hi (own goal) da ka thei ïalehkai jong ka liang pyrshah ha ka minit kaba 33.
Nangta ha ka Group-C, ka Rangdajied United ka la bteng ïa ka jingjop sha ka ar sien lynter da kaba pynliem ïa ka Kharang SC da 2-0 kol. Ïa kine ki kol la thep da ka Larihun Songthiang (23′) bad ka Judith Kharmuti (62′).
Ha ka Group A, ka Nongthymmai SC ka la wanphai nadien ban pynliem ïa ka Umrynjah SC da 2-1 kol.
Ka Umrynjah kan jin da la khur ïa ka jingjop kaba ar sien lynter hadien ba ka Esha Nongrum (25′) ka la buh hakhmat ïa ka kynhun hynrei ka Ribanhun Syiemlieh (29′) ka la lah ban pynïakhaid tang hadien saw minit, nangta ka Lamlynti L Poilang (52′) ka la pynkhih ïa ka namtam ha ka kylla miet.
Kum ka jingpynkynmaw hangne, tang ki ar kynhun kiba wan ha khlieh duh ha kawei pa kawei ka Group (A, B bad C) ryngkat ki ar tylli ki kynhun ba wan kyrdan ba lai kiba kham kynsai kin ïohrung sha ka wat ïakhun Quarterfinal, ïa kaba yn pynïalehkai ha ka rukom ïakhun knock out.
Ka prokram ïalehkai ha kane ka sngi Nyngkong, yn ïohi ïa ka Lumparing SC ka ban aireng pyrshah ïa ka Mawkasiang SC ha ka por 10:30 baje mynstep (Group-B); nangta ka Laitkor SC pyrshah ïa ka Umrynjah SC ha ka por 12:30 baje mynsngi (Group-A); bad khatduh ka Nongrim Hills SC pyrshah ïa ka Kharang SC ha ka por 2:30 baje noh phaisngi (Group-C).