Rakhe ka ICAR ïa ka jingdap 51 snem ka jingïaid lynti ba la shakri ban kyntiew ïa ki kam rep kam riang
Nongpoh, K’lyngkot 09: Kum kawei na ka tnad treikam ka sorkar kmie kaba kyntiew ïa ki kam rep ki kam riang ha ka jylla Meghalaya bad ki jylla shatei lam mihngi ka ri India, ka Indian Council of Agricultural Research (ICAR), Umiam mynta ka sngi ka la lah ban rakhe ïa ka jingïaid lynti kaba 51 snem naduh ba la wan ban seng ïa kane ka tnad treikam ha Umïam kum kata ka tnad treikam kaba peit kyrpang ïa ki kam rep ki kam riang kiba dei katkum ka juk stad kaba mynta.
Ïa kane ka jingrakhe la pynlong ha Dr. Dr. M. S Swaminathan Hall ICAR, Umiam, ha kaba la wan ban shim bynta ruh da u Dr. K.M Bujarbaruah Former DDG (Animal Science) ICAR, New Delhi & Former VC, AAU, Jorhat, u Dr S. Hazarika Director Of ICAR RC NEHR Umiam, ki riew shemphang ha ka rep ka riang lem bad kynthup ruh ki nongrep na kylleng ka them Ri Bhoi.
Ha kane ka sngi, la pynsngew pynsngap ruh ïa ki jingïaid lynti kaba la kot shaduh 51 snem ba ka ICAR ka la shakri na ka bynta ki nongrep bad khamtam ba ka ICAR ka la don ka bynta ban kyntiew ïa ki kam rep ki kam riang, ki kam ri jingri bad kiwei kiwei ym tang na ka bynta ki paid nongrep ka jylla Meghalaya bad kumjuh ruh na ka bynta ki jylla shatei lam mihngi ka ri India.
Kumba la pynpaw da ki nongkren naduh u Dr. K.M Bujarbaruah Former DDG (Animal Science) ICAR, New Delhi & Former VC, AAU, Jorhat bad u Dr S. Hazarika Director Of ICAR RC NEHR Umïam, ki la ong ba ka jingdon kane ka ICAR ha Umïam ka la long shisha ka jingkyrkhu ïa ki paid nongrep ki jylla shatei lam mihngi ka ri India, namar ha kane ka tnad treikam ki la pyndonkam da kita ki buit rep kiba dei lyngba ki kor ki bor, ki buit jong ka jingwad bniah ha ka kam rep (Research) bad kumjuh ruh ba ki nongrep ki la bud ïa ka rukom rep kaba long katkum ka juk stad kaba mynta ban kyntiew ïa ka rep ka riang bad ka ïoh ka kot jong ki nongrep.
Ha kane ka sngi, nalor ka jingrakhe ïa ka jingdap 51 snem ka ICAR, la ïoh ruh ban plie paidbah ïa ka Farm School On Air bad la pynkup burom ruh ïa ki Nongtrei ka ICAR kiba la don bynta ban shakri bad ban len lade na ka bynta ban kyntiew ïa ki kam rep ki kam riang bad khamtam ka jingwad bniah jong ki lyngba ki buit thymmai ha ka rep ka riang kiba la ïarap shibun eh ban kyntiew ïa ki nongrep.