Ki Sub Inspector ba thymmai ki dei ki “skhor bad ki khmat” jong ka Sorkar Jylla: Conrad

Tura, K’Lyngkot 9: U Conrad K. Sangma uba dei u Myntri Rangbah mynta ka sngi Thohdieng u la leit ban ïa don bynta bad sam ïaki shithi thung kam ba la pynlong da ki pulit ka jylla Meghalaya ha 2nd MLP Battalion, Goeragre.
Haba ai jingkren ha kane ka jingialang, u myntri rangbah ka jylla, u la ai khublei ia ki 76 ngut ki Sub-Inspector kiba dang shu thung thymmai bad batai ïa kane ka sngi kum u mawjam kaba kongsan ha ka jingim bad ka kam jong ki. U la kdew ba palat 21,000 ngut ki kyrtong ki la apply na ka bynta ki kam, kaba pynpaw ïa ka jinglong kaba jur bha ka jingïakhun ban ioh kam ioh jam.
U Conrad K Sangma ula ong, kine ki Sub Inspector ba thymmai ki dei ki “skhor bad ki khmat” jong ka Sorkar Jylla ha ka imlang sahlang.
“Ka kamram ba hakhmat eh jong kine ka long ban pynneh ïa ka shongsuk shongsain, lum ïa ki khubor syntiat, bad pynthikna ïa ka jingtreikam ba ryntih ha ki kam Ophis” ong u Conrad.
Shuh shuh u Conrad ula ai jingmut ïa kine ki Pulit ba kin long kiba sngewnguh ïa ka kyrdan ba ki bat wat hapdeng ka por kaba jynjar.
Ula ong ba ka jingjied ha ka jingthungkam ka dei kaba la leh hapdeng ka lynti kaba shai bad ba khuid ba suba bad pynshlur ïa kine ki Pulit thymmai ba kin shim khia bha ïa ki jinghikai pyntbit kaba kin ïoh shen.
U Myntri Rangbah u la ïaroh ïa ka Director General of Police bad ia ka Recruitment Board kaba la pynlong ia kane da kaba khuid bad suba wat shibun ki jingeh ba ia kynduh.
“Kane kam dei tang ka kam, hynrei ka dei ban shakri ia ki paidbah ka Meghalaya bad ia ka ri”, u la ong.
Shwa ia kane, ka Director General of Police, ka kong Idashisha Nongrang, IPS, kala ai khublei, ïa ki ophisar kiba dang shu thung thymmai bad kiba ha iing ha sem jong ki. Ka la pynkynmaw ïa ka jingpynrung kam kaba pyrkhing bha, kaba la sdang da kaba pynmih ïa ka jingpynbna ha u bnai Lber 2024.
Ka la pynpaw ka jingsngewnguh ïa u Myntri Rangbah ka Jylla na ka bynta ka jingkyrshan jong u man ka por hapoh ka jingialam u symbud myntri rangbah ka jylla ba dei peit ïa ka kam pohïing (Police), u Chief Secretary, bad kiwei kiwei ki heh ophisar, kiba da ka jingtreilang jong ki ka la pynthikna ïa ka jingpyndep kaba jop ïa ka jingpynrung kam.
Ka Director General of Police (DGP) Kong Idashisha Nongrang kala pyntip ba napdeng ki 21007 ngut kiba aplai ïa kane ka kam, tang 9507 ngut kila wan ïa shim bynta ha ka Physical Efficiency Test (PET).Nangne, tang 1970 ngut ki kyrtong kila shah jied ban leh ïa ka written examination, kaba lam sha ka jingjied ia ki 76 ngut ki Ophisar.
Kane ka Heh Pulit ka pyntip ba bun na kine ki Pulit SI ba thymmai ki dei kiba don ia ka jingtip ha ki lain Technical bad haduh 23 % ki dei kiba bat ia ka post-graduate degree.
La kynkut ïa kane ka jingialang lyngba ka jingai khublei nau Rituraj Ravi, IPS, Senior Superintendent of Police (TAP).