Shillong, K’Lyngkot 09 : Ka Synjuk jong ki ASHA hapoh ka lama jong ka ka Meghalaya ASHA Workers Union, ka la rai ban bteng beit ïa ka jingïakhih khlem buh por jong ka, wat hadien ba ki la dep ban kynduh ïa ka Joint Director ka National Health Mission (NHM) hynne ka sngi.
Kane ka jingsangeh treikam jong ki ASHA kadei halor ka jingsahteng ka jingsiew (incentives) kaba ki 7000 tam ki ASHA ki dei ban ïoh kaba la sahkut mynta la bun bun bnai.
Haba kren hadien ba la wai ka jingïalang, ka President ka Seng ka Kong Mira June Marsing ka la ong ba ka Joint Director NHM ka la kyrpad ïa ka seng ban weng noh ïa ka jingïakhih, hynrei ka seng ka la rai ban shim shwa ïa kane ka sienjam.
“Ka tnad ka la pynthikna ïa ngi ba baroh ki jingai jingkyrshan kiba dang sahteng yn sa pyllait noh ha ka 24 tarik u Kyllalyngkot. Ngi la rai ban ap haduh kata ka por, bad ïa katei ka por yn khein kum ka shuti na ka bynta ki ASHA ki bym don hok ban ïoh shuti,” ka la ong haba kren bad ki lad pathai khubor.
Ka President ka la ïathuh ruh ba na ka liang ki heh ka NHM ki la kynnoh ba ka jingslem ban pyllait ïa ka jingkyrshan pisa sha ki ASHA ka dei na ka daw ka jingthut ha ki kor ki bor.
“Ki la pyntip ba kam don satia ka jingkyrduh pisa ha ka NHM hynrei la ïathuh ba ka daw ka jingslem kadei namar ka jingthut ha ki kor ki bor,” ka la bynrap biang.
Kane ka nongïalam ka la ong ruh ba kin sa rai lang bad ki para ba treilang ha shwa ba kin shim ïa ka rai kaba ïadei ban weng noh ïa ka jingsangeh treikam. La ïathuh ba ka rai ban khot ïa kane ka jingsangeh treikam kadei kaba la rai lang da baroh ki 7082 ngut ki ASHA kiba don ha kylleng ka jylla bad kumta shwa ba kin weng ïa ka ruh kin hap ban ïa syllok lang bad baroh.
