Ha ki kyndon ain pynngat ka CBI Ïa 6 ngut kiba leh beijot ha por ba ïa um snam ha Manipur
Guwahati, K’Lyngkot 9: Ka ïingbishar ba kyrpang jong ka CBI ha Guwahati ka la buh ïa ki kyndon aiñ pyrshah ïa ki hynriew ngut ki briew bad ka la hukum ban bishar ïa ki ha kaba ïadei bad kawei na ki jingjia ba shyrkhei tam jong ka jingia um snam ba shykhei hapdeng ki ar tylli ki jaidbynriew ha ka jylla Manipur.
Kane ka case ka ïadei bad ka jingjia ha kaba lai ngut ki kynthei ki la shah loit lyngkhuid bad shah pynïaid ha khmat ki paidbah ba bun, arngut na ki ki la shah leh beijot da ka kynhun ne ha ka por mynsngi mynshai, bad arngut ki bahaïing hasem jong uwei na ki lanot la shah pynïap ha ka 4 tarik u Jymmang, 2023.
Ka Central Bureau of Investigation (CBI), kaba dang tohkit ia kiba bun ki case kiba iadei bad ka jingia umsnam ha Manipur, ka la shimti ia ki 27 tylli ki ejahar (FIR) haduh mynta — kynthup ia 19 tylli kiba iadei bad ki kam runar pyrshah ia ki kynthei, lai tylli ki case jong ka jinglute ia ki tiar ialeh, ar tylli ki kam pyniap briew, bad kawei kawei ka case jong ka jingpynkulmar, ka jingrahbor bad ka jingthmu ban leh kam sniew.
U special judge u Chatra Bhukhan Gogoi u la rai ba baroh 6 ngut ki nongshah kynnoh “dei ban bishar da kane ka ïingbishar”.Utei u nongshah kynnoh u la wan mih lyngba ka video conferencing na Manipur bad u la kam ba um donkti hadien ba la dep ban pule bad pynshai ia ki halor ka jingshah kynnoh.
U nongmudui jong ka CBI, u Swayamjeet Sharma, u la pynpaw ba ka jingtohkit, ka la lap ïa ki sabut kiba biang ban pynskhem ïa ka case ba khlaiñ jong ka prima facie pyrshah ïa u nongshah kynnoh.
Na ka liang u nongiasaid ain u la kyntait ba ki sakhi kiba don ha ka rekod kim shym la pynshisha ban buh ia ki jingshah kynnoh na ka bynta baroh ki kam runar ba la kdew ha ka chargesheet.
Ka ïingbishar ka la bthah ba saw ngut na ki nongshah kynnoh — u Huirem Herodash Meitei, u Ningombam Tomba Singh ba la khot sin kum u Tomthin, u Yumlembam Jiban Singh uba la khot sin u Naocha bad Sana, bad u Pukhrihongbam Suranjoy Meitei — kiba don mynta ha ha Manipur Central Jail ha Sajiwa, dei ban pynkynriah noh sha Guwahati bynta ban leh ia ka physical production ha khmat ka iing bishar na ka bynta ban soi ia ki jingshah kynnoh ha ka 16 tarik Kyllalyngkot.