Shillong, K’ Lyngkot 07 : Ka Voice of the People Party (VPP) ka la kynthoh ïa ka sorkar jylla halor ka rai ban ieh noh ïa ka Meghalaya Residents Safety and Security (Amendment) Bill, 2020, bad wanrah bujli pat da ka kyndon kaba syriem kum ka Inner Line Permit ha ka Immigration and Foreigners Act, 2025 ba thymmai.
Katkum ka jingong jong u nongai ktien ka VPP, Dr. Batskhem Myrboh, la kynnoh ruh ba ka kane ka jingleh jong ka sorkar ka paw kumba kam kwah ban pyntreikam ïa ka ILP.
“Haba kren ïa ka ILP, donkam ka mon na ki seng sain pyrthei… Ka sorkar jylla hi ka la sdang ban kren da kiwei pat ki lad ki lynti, kumta phi la don lypa ïa ka minus point,” la ong u Dr. Myrboh da kaba bynrap biang ba kane ka jingleh jong ka sorkar ka pynsting noh ïa ka jingdawa ILP.
Na ka liang une u nongïalam ka VPP u la kynnoh ruh ba ki katto katne ki jingmyntoi ha Meghalaya, da kaba thew ïa ki nongseng kam seng jam, ki long pyrshah ïa ka ILP namar ba ka khanglad ïa ka ïew laitluid bad ka jingwan ki nongtrei.
U la ban jur ba ka jingdawa kaba ïatylli, kumba la ïohi ha Manipur, ka long kaba donkam na ka bynta ban pyntreikam ïa ka ILP. “Ka Manipur ka la ïoh ia ka ILP namar ka jingdawa kaba ïatylli… Ha Meghalaya, ki don shibun ki sur kiba la pra,” la bynrap shuh shuh une u heh VPP da kaba kyntu ïa ki paidbah ban pynkhlain ïa ka jingdawa jong ki ïa ka ILP.
