New Delhi, K’ Lyngkot 07: Ki don ki phlim kiba kiew jar jar. Kim kiew namar ki jingpynbna, hynrei lyngba ka jingkyrshan ha ka por kaba biang. A Late Autumn Dream, ka phlim ba nyngkong jong ka Pramati Anand, kadei kawei na kum kine ki jait phlim. Ka jingïaid lynti jong ka, ka pyni kumno ka WAVES Film Bazaar ka lah ban rah shakhmat ïa ka kam.
Ka projek ka la rung ha ka WAVES ha ka por ba dang sdang lyngba ka NDFC Screenwriters’ Lab. Dei hangne ba ka screenplay ka la sdang ban ïoh ïa ka jingshai, ka jingshaniah bad ka jinglong ba la pynkhreh ha ka kam. Ha ka jingïaid lynti ha kane ka lab, ïa ka jingïathuhkhana jong ka phlim, ka drama shaphang ka imlang sahlang bad saiñ hima sima ha Meghalaya, ka la wan dur lyngba ka jinghikai ba la pynleit jingmut bha. Kane ka kam ka la ïarap ban pynjanai ïa ka jingïathuh khana bad ka jingthmu katba ka dang pynneh ïa ka tynrai jong ka kaba ïadei bad ka kolshor bad ka jingsngew.
Ha ka WAVES, ka A Late Autumn Dream ka la pawnam namar ka jinglong kaba kyrpang jong ka. Ka phlim ka pynïasoh lang ïa ka jinglong ba shisha bad ki khanatang bad ka ïadei bad ki phang jong ka jinglong, ka jingshah pynkynriah jaka, bad ka jingïadei jong ki briew ha ka jinglong jingman kaba jynjar ha ki jaka khappud. Ka jingïathuh khana kaba don nongrim ha Meghalaya, ka bud ïa arngut ki samla kynthei-ka samla pule Bengali bad kawei ka khynnah kynthei Khasi-kiba shem ba ki la jah noh ha ka khlaw kaba shong da ki bor ba kyntang. Da kaba don tynrai ha ki jingkylli jong ka jinglong kyrpang jong ka kolshor bad ka jingïakynat ha ki jaka khappud, ka khana ka la sawa jur hapoh ka jinglong jingman jong ka roi ka par.
Ka jingïaid shakhmat ka la bteng hadien ka lab. Lyngba ka screenplay ba la kham pynkhlaiñ, kane ka projek ka la ïaid sha ka Rewrite 1.2 da ka Studio Ainak, da kaba tei shuh shuh ïa ka nongrim ba la buh ha WAVES. Kham hadien kane ka phlim ka la shah jied kum shi bynta jong ka kynhun Women in Film India kaba leit sha ka Toronto International Film Festival. Kane ka la buh ïa ka projek ha ka jingpeit jong ka pyrthei ban kyntiew ïa ki phlim bad ka la pynpaw ïa ka ha kylleng ka pyrthei.
Ka jingkylla kaba khraw ka la wan haba ka Platoon One Films ka la ïasoh lang bad kane ka projek kum ka lead production kompani. Ki producer ki la ithuh ïa ka script kaba la pyndep, bad ïa ka phlim kaba la shna lyngba ki rynsan kiba ryntih. Ka jingïasoh jong ki ka la long ka jingkylla ha ka A Late Autumn Dream na ka jingpynkhreh sha ka jingbiang ban pynmih noh.
Ïa ka Pramati Anand, kane ka screenplay ka wan na ki jingshem shimet jong ka ha ka UNESCO projek, kaba buh ïa ka nongrim jong ka ha ki jingshisha. Ïa ki producer, kane ka phlim ka ïahap bad ki thong, kiba ïohi ïa ki lad ban tei ïa ka khana kaba khlaiñ katba ka don ka tynrai kaba skhem ha ka jaka bad ki jingsngew.
Ka jingïaid lynti jong ka A Late Autumn Dream ka pyni kumno ka WAVES Film Bazar ka treikam kum ka jingplie lad. Da kaba plié lad ïa ki khana ba kin kylla bad pynïasoh ïa ki nongshna phlim bad ki nongïatreilang ba ïahap bad ki, kane ka rynsan ka plié lad ïa ki sur ba dang mih ba kin ïaid shaphrang.
Da kabe leh ïa kane, ka WAVES ka bteng ban tei ïa ki phlim shimet bad ruh ïa ki lad ïa ki khana ba thymmai jong ka India ba kin shem ïa la ka lawei.
