Haduh 300 ngut ki paidbah ha ka thaiñ Maheshkola ïoh jingïarap da ka song pisa na u Bah Pius Marweiñ

Mawkyrwat, Naitung 08: U MLA bad MDC jong ka Ranikor Constituency, bah Pius Marweiñ, South West Khasi Hills District ha ka 4 bad 5 tarik u Naitung, 2022 da lade u la leit jngoh ïa ki katto katne ki shnong kiba don ha ka thaiñ Maheshkola kaba hap hapoh ka Ranikor C&RD Block kiba la shah ktah ha ki bor jong ka mariang ha une u bnai Jylliew.
Ka jingleit jngoh markhmat bad leit ai ka jingiarap jong u bah Pius lyngba ka song pisa ka long sha ki 12 tylli ki shnong kiba la shah ktah ha ki bor jong ka mariang ha une u bnai ba la dep na ka daw ka jing jur u slap kaba la wanrah ïa ka jingshlei um bad twa ki surok kali ha kaba ka la ktah shibun ïa ki nongshong shnong.
Haba kren bad u bah Pius Marweiñ, MLA/ MDC ka Ranikor Constituency u la ïathuh ba ka jingleit noh jingïarap ka long ïa ki 12 tylli ki shnong kiba kynthup haduh 300 ngut ei ei ki briew ki la ïoh ka jingïarap lyngba da ki song pisa bad ki shnong ki kynthup ïa ka shnong Maheshkola, Sohmylleng, Chitokgre,Dambaggre, Rongdiggri, Ganganagar A bad B, Goraibari, Upper Goraibari, Upper Gillagora, Rongdangngai bad kiwei de.
La ong ruh ba dang ha u bnai Jylliew ha kitei ki thaiñ Maheskola ki shnong kiba hap markhap bad ka South Garo Hills ki la shah ktah shi katdei eh na ka daw ka jingjur u slap ha kaba haduh ba ki briew ki hap ban sah kut noh tang hapoh shnong jong ki. Kumta na ka liang ka sorkar jylla ha ryngkat bad ka jingïatreilang bad u MLA/MDC ka Ranikor Constituency, bah Pius Marweiñ ki la ïoh ban lei ai jingïarap da ki marbam lyngba ki helicopter jong ki Air Forces kiba pynpoi marbam ha kine ki thaiñ Maheskola.
Ha kaba ïa dei bad ki lynti ki surok kali na ka liang u bah Pius Marweiñ u la ïarap ban maramot ïa ki katto katne ki surok bad ki jaka ba la shah pynjulor ha ki bor jong ka mariang ha kitei ki thaiñ bad mynta ki lynti ki synkien ki la long kiba ïaid beit ïaid ryntieh ha kaba ki kali bad ki briew ki la lah ban ïaid ban ïeng lyngba ki surok.
Namarkata, ki paidbah jong katei ka thaiñ ki la pynpaw ka jingsngewnguh kaba khraw ïa u Nongmihkhmat uba la trei shitom bad long ba la kloi ban ai ka jingïarap ha kaba kum kane ka por ba ki paidbah ki la ïoh mat ïa kine ki jingjia bad ki jingeh na ka daw jong ka jingshah lyngshop ha ki bor ka mariang. Ha ka juh ka por ki da kitbok kitrwiang ïa u ba un nang lah ban trei shitom shuh na ka bynta ki jingdonkam jong ki paidbah jong ka thaiñ bad ka Ranikor Constituency baroh kawei.