Jowai, Naitung 08 : U Hony. General Secretary ka West Jaiñtia District Sports Association (WJDSA) Jowai u ma Lammat-oo Laloo ula pyntip ba kan don ka jingpeitbniah (Screening) ïa ki player na ka bynta ka lympung ïalehkai phutbol jong ka ‘Independence Day Cup U-17 Football League cum Knockout Tournament’.
Ïa kane ka jingpeitbniah ïa ki player la pynbeit ban pynlong haka 16.07.2022 naduh ka por 9 baje mynstep ha ophis ka Association ha Kiang Nangbah Indoor Hall Ladthalaboh Dongmihsngi Jowai.
Ha kaba ïadei bad kane la kyrpad ïa baroh ki kynhun (Teams) kiba la dep siew ïaka bairung, ba kin wan biang por ha katei ka sngi ba la kdew ha ryngkat ki syrnot ban pynshisha ïa ka rta jong ka sngi kha jong ki player, la pyntip shai lada don kiba wan palat ïa ka 2 baje nohphai sngi ym lah ban pdiang shuh ïa ki.
