Nongpoh, K’lyngkot 04 : Ka Dorbar Shnong Umran Dairy ha Ri Bhoi District ka la buh syndon da ka jingmaham kaba tyngeh ïa ki paidbah ba ïaid ba ieng lyngba ka surokbah National Highway-6 ha Ri Bhoi bad ruh wat ïa ki paidbah nongshong shnong ba kim dei ban bret jaboh pathar sha ka wah Umran, kaba dei kawei na ka wah ba ki nongshong shnong ki pyndonkam ha kaba sum bad kaba dei ruh ka wah kaba don harud jong katei ka surokbah.
Kum ban pynkynmnaw, haba ïa kren halor ka ka khuid ka suba bad ban kiar na kaba bret pathar ïa ki jaboh ha ki jaka paidbah ne sha ki um ki wah, ka long shisha kaba sngewsih ba haduh mynta dang don ki briew kiba dang duna ha ka pyrkhat ka pyrdaiñ bad kim kheiñ snep satia halor ka khuid ka suba da kaba bret pathar ïa ki jaboh sha ki jaka paidbah ne sha ki um ki wah.
Haba ioh ban ïa kren bad u Rangbah Shnong ka Umran Dairy u Bah Lam Bina, u la ong ba ka Dorbar Shnong na ka por sha ka por ka la ju maham ïa ki riew paidbah ban bret jaboh sha ka wah Umran bad na ka liang ka shnong ka la rai ban dang pyrkhing na khang pyrshah ïa kino kino kiba bret jaboh sha katei ka wah.
U la ong ruh kane ka maham ban bret jaboh sha katei ka wah ki kynthup naduh ka jingbret ïa ki plastic, ki bitor bad kiwei kiwei ki jaboh kiba ktah ai ka khuid ka suba jong katei ka wah, namar kumba long haduh mynta ki paidbah nongshong shnong ki dang pyndonkam ïa katei ka wah na ka bynta ka ka sum ka sait bad ka khuid ka suba jong ki paidbah nongshong shnong.
Shuh shuh, u la bynrap ruh da kaba ong ba kane ka jingmaham ka kynthup naduh ki nongleit nongwan lyngba kane ka surokbah bad ruh ki nongshnong shnong bad khamtam kito kiba shong basah ha syndah jong katei ka wah ba kim dei ban bret ïa kino kino ki jaboh bad lada ka Shnong ka dang lap ïa kiba ïa leh pyrshah kum ka bor shnong kan shim da ki lad kiba tyngeh ban pynshitom ba kum ka Shnong ka kwah ban pynneh ïa ka jingkhuid jong katei ka wah Umran, u la bynrap.
