SHILLONG, Kyllalyngkot 04: Ka Lagan 2.0 bad ka Metallica Rising ki la jop ïa la ki jong ki jingïalehkai ha ka Shillong Cricket League 2nd Division 2025 ba la pynlong da ka Shillong Cricket Association.
Baroh ar ki la jop haba wan ban tied nadien, ha kaba ka Lagan 2.0 ka la jop da 3 wiket pyrshah ïa ka Golflink XI Star, katba ka Metallica Rising ka la jop suk da 8 wiket ïa ka Sportive CC.
Ka jingïalehkai kaba nyngkong la ïohi ïa ka Golflink XI Star kaba la kam trai ban tied nyngkong hadien ba jop ïa ka jingkynting pisa (toss) bad buh ïa ka thong kaba 175 ron da kaba khyllem 7 wiket haki 20 ober. Kiba la lamkhmat ha ka tied ki long u Mukesh Ghosh (45 ron naki 24 bol) bad u Ankit Kumar Rathor (43 ron naki 38 bol).
Ka Lagan 2.0 ka la pyndep ïa ka kamram ha ka ober ba khatduh, da kaba kynjoh 176 ron bad hap 7 wiket haki 19.2 ober. U Anuj Kumar (48 ron naki 26 bol) uba la khur syndon ïa ka khusnam Player of the Match, bad u Sameer Dhanraj (33 ron naki 20 bol) ki la long ki nongtied ba kongsan tam kiba la ïalam ïa ka Lagan 2.0 sha ka jingjop.
Ka jingïalehkai kaba ar ruh ka la long kumjuh, ha kaba ka Sportive CC ka la jop ïa ka toss bad shimti hi ban tied nyngkong hynrei ka la shah pynkut noh da tang 128 ron naba khyllem baroh 10 wiket haki 19.1 ober.
Kiba la noh synñiang bun ron ïa ka Sportive CC ki long u Abhijeet Chanda (47 ron naki 24 bol) bad u Andrew Lyngdoh (38 ron naki 36 bol).
Ka namtam ka long sha u Babul Doley, rangkawang bol jong ka Metallica Rising, ha kaba u la khur 5 wiket bad ailad tang 14 ron naki 4 ober shuwa ba ka kynhun kan pyndep ïa ka kamram ha ka pali tied.
Ka Metallica Rising ka la duh tang 2 wiket ban kamai 130 ron haki 14.4 ober, ha kaba u Jaspal Singh u la lamkhmat ha ka tied da kaba kamai 69 ron naki 44 bol hynrei ïa ka nam Player of the Match la khur da u Babul Doley.
