Ka jingbyrngem ban knieh ïa ka NE, ka dei ban pynpeit mat ïa ka sorkar India : Hamlet

Shillong, K’Lyngkot: Ka jingbyrngem ki nong Bangladesh ban knieh noh ïa ki jylla ka thain shatei lam mih ngi bad ban pynrung noh sha Bangladesh, kadei ban pynpeit mat ïa ka sorkar India bad kam dei ban khein sting ïa kane ka jingbyrthen.
Haba kren sha ki lad pathai khubor u Bah Hamlet u la ong, “Lada ka sorkar India ka shim ïa kane ba ym long ban khein sting ïa ki jylla ka thain shatei lam mih ngi kadei ban ai da ki ain ba khlain bad wanrah jingker sainar shiah hapoh ka jylla Meghalaya hi baroh kawei.”
Haba ngi ïa kren halor ka jingker sainar shiah, u Bah Hamlet u la ong kynmaw ba ka sorkar India kadei ban shim ïa ka jingiatrei lang ïa ki trai jaka, ki Rangbah Shnong, ki Sordar ki Wahadadar bad kiwei kiwi de khnang ba kane ka jingthmu kan long kaba sei soh khnang ba ngin lah ban iada na kane ka jingthmu ki briew na Bangladesh.
S huh shuh u Bah Hamlet u la ong, “Kumba long mynta ka jingpahara hapoh ka jylla jong ngi ka dang bit dang biang hi namar ba ngi ïohi ba ki shipai ïada khappud ki Border Security Force ki don la ka jong ka bynta bad ki Pulit ka jylla ruh ki don la ka jong ka bynta.”
“Hynrei haba ngi pat ïa kine ki jingkren kiba kren na kawei pat ka ri ne na shilliang duriaw ka sorkar India bad ka sorkar jylla ruh ym dei ban khein sting bad ngi hap long kiba la pynkhreh namar ba ngim tip kiei ban jia lashai la shi sngi” ong u Bah Hamlet.
Haba ia kren halor ka jingïoh rung ki briew kiba nabar ne ka (influx) u Bah Hamlet u la ong ba kane ka mat kadei kaba eh bha hapoh ka jylla Meghalaya, hynrei dokbok ba ka KSU naduh u snem 1978 ter ter kala ïa khih bha ha kaba iadei bad kane kamat bad sngewburom shisha ïa ka KSU bad kiwei ki seng bhalang kiba la shim khia ïa kane ka bynta.
Kaei kaba la ïa kren ha ki por ba mynshwa, ngi ïohi mynta ba ki lah jan ban urlong bad ka don shisha kata ka jingma ïa ki jylla ka thain shatei lam mih ngi bad ruh ïa ka jylla Meghalaya na ka jingwan jong ki briew kiba nabar khamtam eh ha kaba iadei bad ka jinglong jingman hapoh ka ri Bangladesh, ong u Bah Hamlet.
Shuh shuh u Bah Hamlet u la ong, “Kum ka sorkar dang ha kine ki khyndiat sngi dang shu dep ban ïa kynduh ïa u Union Home Minister na ka liang u Myntri Rangbah bad u Symbud Myntri Rangbah ban pyrshang pynbor biang ban kyntu ïa u Union Home Minister ba u dei ban ai ïa ka Inner Line Permit (ILP) hapoh ka jylla Meghalaya, hynrei ngi kwah pat ba ka sorkar India kan jubab lada ym dei da ka ILP hynrei kadei ban aid a kawei ka ain kaba kham khlain ka ban ïada ïa ka jingwan ki briew ba nabar sha ka jylla jong ngi.”