Shillong, Nohprah 23: Ka seng United Democratic Party (UDP) ka la pynrem jur halor ka jingshah thombor da u bom Improvised Explosive Device (IED) ba dang shen hapoh ka Dhar Construction Company kaba ha East Jaiñtia Hills, bad na ka liang ka seng ka kyntu ïa ka sorkar jylla ba kan pynlong ka jingtohkit bad kumjuh ruh ba kan pynlong ka jingïakren bad ka Hynñiewtrep National Liberation Council (HNLC).
Haba kren sha ki lad pathai khubor u General Secretary ka UDP u Bah Titosstarwell?Chyne u la ong, “Kum ka party ngim lah ban pdiang ïa kino kino ki kam kiba byrngem briew ne ki jingshah thombor. Ngi kwah ia ka jingsuk bad ka jingshngaiñ ha ka jylla, hynrei ngim lah pat ban sngewthuh balei kum kine ki wan jia. Kadei ka kamram jong ka sorkar ban wad ïa ki lad ki lynti balei kine ki kam ki wan jia. Ngi kmen ba ka sorkar ka kwah ïa ka jingïakren ïasuk bad ngi da angnud shisha ba kine baroh ar party kin shong ha ka meij jong ka jingïakren ïasuk. Ma nga shimet bad kum ka party UDP, ngi kyrpad ïa ka HNLC bad ki nongïalam jong ka ban wan shaka meij jong ka jingïakren ïa suk. Kane kam dei ha ka sien kaba nyngkong ba ki la wan bad ngam lah ban sngewthuh balei kane ka jingïakren ka la pulom nga kyrmen ba ka sorkar jylla kan shim khia ïa kane ka kam.”
Lah ban ong ba kane ka jingkyrpad jong ka UDP ka la wan hadien ka jingshah pynbthei bom IED, kaba la suba ba ka don ka jingïadei bad ka HNLC.
Na ka liang u Symbud Myntri Rangbah ka jylla u Bah Sniawbhalang?Dhar u la banjur ba ka sorkar kan ym ailad ïa ki kam lehnoh ha kane ka jylla bad ong ruh ba ka sorkar ka long kaba kloi ban plie ïa ka jingkhang ban ïakren bad ki kynhun lehnoh.
Lah ban ong ba na ka liang ki pulit ki la kem ruh ïa 2 ngut ki nongkyrshan jong ka HNLC ba la suba ba ki donkti ha kane ka jingjia.
