Da ki marbam noh synñiang ka District Youths Congress Committee ha Rehabilitation Centre, Sohkhyllam
Mawkyrwat, Nohprah 23 : Kum shibynta jong ka jinglehkmen khristmas mynta u snem 2025, ka South West Khasi Hills District Youths Congress Committee ha ryngkat ka District Congress Committee ha ka 22 tarik u Nohprah, 2025 ki la leit ban noh synñiang da ki marbam hapoh ka Rehabilitation & Counselling Centre, Sohkhyllam, South West Khasi Hills District.
Kane ka jingleit ban noh synñiang jong ka South West Khasi Hills District Youths Congress Committee hapoh ka Rehabilitation & Counselling Centre ka long ruh kum shibynta jong ka jingleit ai mynsiem ïa ki samla kiba la ngop ha ki jingdih kiba sniew kum u drok, ba lyngba ka jingdon jong ki hapoh kane ka Counselling Centre kan sa long da shisha kawei na ki lad ban pynthymmai ne ban pynkylla ïa ka jingim jong ki na kaba ki ju mlien ïa kaba sniew sha ka jingim kaba bha.
Ym tang kata, ki la ai mynsiem ruh ïa ki, ba haba ki don ka mon ban kylla ka lad na ka bynta jong ki kan nym khang hynrei tang lada kim don ka mon ïa kata ym lah ban pynbor da mano mano ruh. Namarkata, ki la kyntu ïa ki samla kiba don ha kane ka jaka sumar ba kin long borabor ki briew kiba skhem ka jingmut ym ban buh kano kano ka jingartatien ban ieh noh shadien ïa kiei kiei ki kam kiba sniew bad ban kylla noh sha ka jingim kaba bha da kaba kin long ruh ka nuksa ïa kiwei de.
Shuh shuh lyngba ka jingleit jong ki hapoh kane ka Counselling Centre ka la long ruh ka jingaimynsiem na ka bynta ki nongpeit nongkhmih ha kaba ka South West Khasi Hills District Youths Congress Committee ka la ai ruh ki kyntien ai mynsiem ba haba ki trei ïa kano kano ka kam kabab ha trei naduh ka mynsiem bad ka jingaiti lut khnang ba kiba shah hikai kin lah ban kylla.
Kiba la ïa donlang ha kane ka sngi bad kiba la ai jingkren ki long naduh u bah Kynpham V. Kharlyngdoh uba dei u President ka District Congress Committee (DCC), u bah Iengskhem Syiemlieh, President jong ka South West Khasi Hills District Youths Congress Committee, u bah Stepingstone Syiemlieh, Secretary jong ka Life Care Foundation, ka kong Victorialness Syiemlieh, President Mahila Congress Committee lem bad kiwei de.