Sam jingïarap pisa ka WjSU sha ki khynnah ba pass ïa ka War Jaiñtia Scholarship Examination-2025
Jowai, Nohprah 23: Ka Warjaiñtia Students’ Union (WjSU) hynnin ka sngi 22 tarik u Nohprah kala sam jingïarap pisa sha ki 64 ngut khynnah skul ka thaiñ War Jaiñtia kiba la pass shakhmat ïaka 2nd War Jaiñtia Scholarship Examination-2025, haka jingïalang bala pynlong ha Riwar Jaiñtia CoG Secondary School, Ladjaplem, Amlarem West Jaiñtia Hills.
Ha kane ka sngi la wan ban donlang da u MLA ka thaiñ u ma Lahkmen Rymbui uba dei u myntri ka tnat pule puthi jong ka sorkar jylla kum u kongsan, ka kong Dolly Khonglah kum ka symbud kongsan, u President ka HYC Central Body, bah Roy Kupar Synrem, ki kmie ki kpa, ki nonghikai, ki paidbah nongshong shnong, nalor kiwei de kiba la shah khot sngewbha.
Ha kane ka sngi la pynkup burom ïa kitei 64 ngut ki samla pule kiba la pass ïa kane ka Examination kiba kynthup 37 ngut ki samla pule na ka Section-I, 12 ngut ki samla pule naka Section-II bad 15 ngut ki samla pule na ka Section-III kiba la ïoh ïaka jingkyrshan pisa kum ka Scholarship bad ka Certificate of excellence.
U Myntri ka tnad pule puthi ma Lahkmen Rymbui haba kren ula pynpaw ka jingsngewkmen halor kane ka jingthmu ba bha jong ka WjSU na ka bynta ki khynnah pule ka thaiñ. Ha ka juh ka por u kyntu ïa ki kmie ki kpa ba kin sngewthuh ïa ka jingkordor jong ka pule puthi da kaba phah ïa ki khun jong ki sha ki skul bad ban bteng ïa ki jingpule kiba kham shalor, khnang ba kin ïoh ka jingnang jingstad bad ka lawei ba phyrnai.
Ka kong Dolly Khonglah kala ong ka jingnang jingstad ka long kaba donkam eh bad ka jingithuh ïa ki sap haka por ba dang rit ki dei ki sienjam kiba kongsan bha ban thaw dur ïa lawei jong u ne ka khynnah skul.
Ha kaba pynkut ïaka prokram, u General Secretary ka WjSU ma Everest Langstang ula pynpaw ka jingsngewnguh ïa baroh ki nongwan sha kane ka prokram bad kumjuh ïa kiba ai jingkyrshan ïa kane ka jingthmu ba bha jong ka seng na ka bynta ban pynkiew ïa ka jingnang jingstad hapoh ka thaiñ War Jaiñtia bad ha ka jylla hi baroh kawei.