Da ka jingpynkup burom ïa ki player ba la mihkhmat ïa ka India plie pyrda ka MFA ïa jingdap ba 50 Snem

Shillong, Nohprah 23: Kum shi bynta ban rakhe ïa ka lyngkhuh snem kaba 50, ka Meghalaya Football Association (MFA) hynnin ka miet jong ka lah sngi U Blei, ka la pynlong da ka jingïalang ban pynkup burom ïa ki rang bad ki thei ïalehkai phutbol ka jylla, kiba la bteng ïa ka jingim ka jong ki ban ïoh ban da mihkhmat ïa ka jylla, ha kaba ka jingpynkup burom ka la bteng ruh wat sha ki coach, referee ne wat ki para dkhot kiba la ïoh ban ïadon bynta lem naka bynta ki kam phutbol jong ka ri.
Ïa kane ka jingïalang la pynlong ha State Convention Cente, ha kaba u kongsan ba la wan ban don lang dei u Myntri ba dei khmih ïa ka tnat Sports & Youth Affairs u bah Wailadmiki Shylla, nangta bah Banteidor Lyngdoh (MLA Mawkynrew) President ka Shillong Sports Associatuon, bah Gavin M Mylliem MLA , u Advicer ka sorkar jylla u bah Himalaya M Shangpliang, u Chief Secretary barim ka sorkar jylla bah D.P Wahlang, u Kipa Ajay Treasure ka All India Football Association, President bad Secretary ka MFA Bah Hamletson Dohling bad bah Sunesh M Syiem, ki dkhot nongkit kam ka MFA bad kumjuh jong ka SSA bad ki synjuk ïalehkai phutbol jong ki district.
Ïa ka MFA la seng ïa ka ha u snem 1976, kaba da kane ka jingïalang nangne shakhmat kan khreh ba kan pynlong ïa kiba bun pat ki prokram ki jong ka ha ki sngi bad ki bnai ban sa wan.
Ka thup kyrteng ki nongpdiang ïa ki khusnam, ka long da shisha kaba pynsngew sarong ïa ka jylla, kiba dei ka jingtreishitom, ka jingkut jingmut, len lade bad aiti lut ka jong ki player, ba ka pynlong ïa ka Meghalaya ba kan lah ba kan sei ïa la ki jong ki rang bad ki thei ïalehkai kiba da kynsai bd ba nylla.
Ka khusnam ba la sdang ban sam nyngkong eh jong ka janmiet, ka leit sha (L) bah Fullmoon Pyrtuh, u player ban ïoh mihkhmat ïa ka India ha ka lympung ïalehkai jong ka 13th Asian School Football Tournament bad kumjuh sha (L) John Shadap ba la don bynta bad ka kynhun U-17 ka India ha u snem 2004.
Kiwei pat kyrteng kiba la mihpaw ha kane ka janmiet pynkup burom ki long Rocus Lamare, Eugeneson Lyngdoh, Aiborlang Khongjee, Marlangki Suting bad Samuel Lyngdoh Kynshi ïa kaba la bynrap lang da ka jingpynkup burom, ïa ki thei ïalehkai kum ka Bonifilia Shullai, Alisha Lyngdoh, Fragrancy Riwan, Ribansi Jamu bad Ribahunshisha Kharshiing.
Lait na kine, ka jingïalang ka la wan shakhmat ba kan ainam bad pyrto lem ïa coach kiba la paw kum bah Hering Shangpliang ba la coach ïa ka kynhun jong ka Indian U-20 ha u snem 2000-06, ka kong Riïohlang Dhar kaba la lah ba kan kynjoh shaduh ka kyrdan kum ka Fifa Assistant Referee bad ban shah jied ban pynïaid ïa ka U-17 Women’s World Cup 2024, la pynkup burom ruh ïa u Secretary barim bah Bor Diengdoh bad u bah Hamletson Dohling kiba la shah jied ban long kum u Manager ka kynhun ïalehkai football jong ka India.
Kiwei kiwei pat ki player ba ka MFA ka la pynkup burom hynnin ka miet ki kynthup Pele Lyngdoh, Wiwon Kurbah, Weilad Passah, Lekini Suting, Ailad Kharngapkynta, Poibiang Pohshna, Bevan Marbaniang, Larry Diengdoh, Samuel Shadap, Berland Syngkon, Romeo Suklein, Chanmitre Thma, Kyntiew Shaphrang Kharluki, Enestar Malngiang, Shaiborlang Kharpan, Rupert Nongrum, Pynkhrawbok Kurbah, Aenam Graffenberg Jyrwa, Banlam Nongkynrih, Aiborlang Thangmaw, Ricky John Shabong, Lionel Daryl Rymmei, Halen Nongtdu, Manbhakupar Malngiang, Banlamkupar Rynjah and Ronney Wilson Kharbudon.
Ha ka jingkren maitphang , u bah Hamletson kum u President ka MFA, u la ieng ban pynkynmaw ïa ka sien jam ba ka synjuk ka la dep ba kan shim ïa ka rai bad katta ka long ba nangne shakhmat, ka synjuk kan da ai ïa ka song ïarap sha ki rang ne ki thei ïalehkai lada jia ba ki ïoh ïa ka kabu ksiar ban shah jied ban mihkhmat ne phong ïa ka jersey jong ka India.
Katba na ka liang u bah Wailadmiki Shylla, uba ïalade ruh u dei uba ieit bad sngewtynnad bha ïa ka phutbol, u la pynpaw ïa ka jingthmu ka sorkar ban tei ïa ka Mawkhanu Football Stadium, ha ka juh ka por ba kum ka jylla, ka la lah ha kaban ïoh ba kan pynlong lem ïa ki lympung bah ïalehkai phutbol ka ri kum ka Durand Cup, ka jingïalehkai jong ka Indian Super League, bad ki lympung ïalehkai phutbol ba dei jong ka ri, kampher lada dei jong ki kynthei ne shynrang (international matches).
Ïa ka jingai khublei, la ïoh na u secretary ka MFA bah Sunesh.M. Syiem.