Shillong, Nohprah 23: Ka Election sha ka Apex Council bathymmai jong ka Meghalaya Cricket Association ka la long ha ka sngi Thohdieng, ka 19 tarik Nohprah, 2025 jong ka taïew ba ladep ha kaba u Myntri barim ka Sorkar jylla Meghalaya u James PK Sangma u la shah jied kum u President ba thymmai jong kane ka synjuk kriket ka jylla.
U James Sangma un shimti ïa ka kam kum u President na u Nababrata Bhattacharjee. Lah ban kdew ruh ba u James PK Sangma u la bud ruh ïa ki dienjat jong u para u Conrad Sangma (uba long mynta u Myntri Rangbah ka Jylla Meghalaya), uba la long President jong ka MCA tad haduh u snem 2019.
Haba mihkhmat ïa ka Tura District Cricket Association, u James Sangma u la ïakhun pyrshah ïa arngut ki kyrtong -u Sengnab Momin jong ka North Garo Hills District Cricket Association bad u Arwotki Sumer jong ka West Jaintia Hills District Cricket Association.
“Ka long ka burom bad ka jingsngewrit ban shah jied kum u President ka Apex Council jong ka Meghalaya Cricket Association,” la ong u Sangma hadien ba la pynbna ïa ka resol. “Nga sngewnguh ïa baroh ki synjuk Distrik ba la ïasoh, ki nongkitkam, ki nongïalehkai, ki coach bad ki nongkyrshan kiba la pynskhem ïa ka jingshanñiah jong ki ha nga. Kane ka jingbthah ka dei ka jingkitkhlieh ban trei shitom na ka bynta ka jingsynshar kaba shai, ki jingtei kiba kham bha bad ki lad ki lynti kiba kham bun na ka bynta ki samla nongïalehkai kriket jong ngi ha kylleng ka Meghalaya. Da kaba khmih lynti ban ïatreilang bad ka longïing ka MCA, ka BCCI bad baroh ki nongshim bynta ban rah ïa ka kriket ka Meghalaya sha ka kyrdan kaba shalor bad ban pynlong ïa ka Jylla jong ngi kum ka bor kaba khlaiñ bad kaba lah ban ïakhun.”
Kawei pat ka kam ba la pynïakhun, ka long na ka bynta ka kam Honorary Treasurer, ha kaba u Eddystone Shylla na WJDCA u la shah jied da kaba jop pyrshah ïa u Bah Dister Marbaniang jong ka East Khasi Hills Cricket Association. U nongmihkhmat ba mynta, u Dhrubajyoti Thakuria, um shym la don ha ka jingïakhun namar ba u hap hapoh ka ‘cooling off period’ hadien ba u la shakri ar samoi lynter.
Katba ha kiwei pat ki kam ki kyrtong ki la shah jied khlem don nongïaleh pyrshah – ha kaba u Bah Rayonald Kharkamni (jong ka Ri-Bhoi DCA) u la wanphai biang kum u Honorary Secretary, Mebanphira Swer (West Khasi Hills DCA) kum u Honorary Joint Secretary, u Rajiv Bareh (East Jaiñtia Hills DCA) bad u Churou DCA (East Jaiñtia Hills DCA) kum u Vice-President bad Dkhot jong ka Apex Council.
Ha ka jingshisha la thmu ban pyndep ïa kane ka elekshon ha ka 09 tarik u Nohprah hynrei la pynkynriah noh hadien ba ka la don ka jingpyrshah da ka Shillong Cricket Association.
Ha kajuh ka por, u Electoral Officer u la pynpaw ba “ka jingpynlong elekshon baroh kawei ka long kaba shai, kaba laitluid bad kaba hok. La pynlong ïa ka halor ka nongrim jong ki kyndon bad rukom treikam jong ka BCCI ban pynïaid ïa ki elekshon bad kumjuh ruh da ka jingïalam bad ki kyndon jong ka Election Commission of India.”
