Da 2-1 pynliem ka Meghalaya ïa ka Arunachal ban ïohrung sha ka final round

Shillong, Nohprah 23: Ka Khrismas ka la wan kham kloi na ka bynta ki paidbah ba ieid phutbol ka Meghalaya namar ba ka kynhun ïalehkai ka jylla ka la lah ban pynliem ïa ka Arunachal Pradesh da 2-1 kol ha ka jingïalehkai ba khatduh jong ka Group E ha ka Senior Men’s National Football Championship na ka bynta ka Santosh Trophy 2025-26 ban pynthikna ïa ka jaka ha ka wat ïakhun ba khatduh (final round), ka ban sa long ha u bnai ban wan ha Assam.
Ka Meghalaya ka la donkam ban jop bad ban thep ym duna ïa ka ar kol bad ka la jia kumta hi hynrei ka la long ka jingïalehkai kaba pynsyier bha na ka bynta ki nongkyrshan kiba la wan tuid ha madan First Ground-SSA Stadium, Polo hynne ka janmiet.
U Shano Tariang (67’) u la thep ïa ka kol kaba nyngkong tang hapoh saw minit hadien ba u la mih madan kum u nongbujli, katba u Apborlang Kurbah (74’) u la pynjlan ar shah ïa ka kol hadien katto katne minit. Hynrei ka Arunachal kam shym la kynrandien na ka jingïakhun, bad ka la ïoh ban pynphai kawei ka kol lyngba u Midul Doley (83’) hynrei ka kynhun ba ïalehkai ha la ïing ka la pynskhem triang shadien ha ki minit ba dang sah ban pynthikna ïa ka jingjop.
Ha kaba kut baroh lai tylli ki kynhun ki la pyndep mar 3 poiñ bad baroh ki don kajuh ka jingïapher kol kaba long 0. Hynrei ka Meghalaya ka la ïoh ïa ka kyrdan ba nyngkong lyngba ki kol ba ka la ïoh thep haba ïanujor bad ka Arunachal bad Sikkim kiba la thep tang 2 kol ha baroh ar tylli ki jingïalehkai.