Ha ki 43 snem tang uwei u Genl. Secretary ka APSTA; ïoh syndon ka seng da ka ïing kaba kham heh

Shillong Nohprah 22 : Ha kiba bun ki seng ne kynhun trei mon sngewbha, ym ju kham shem koit ba ki briew kiba don bynta naduh ba sdang ban thaw ïa ka kynhun kin dang bteng ban ai ka jingshakri bad bteng ban ïakit ïabah bad aiti lut khlem thait satia haduh mynta.
Kane ka dei shaphang kawei ka seng jong ki nonghikai skul ha kane ka Jylla kaba la tip kum ka All Primary School Teachers Association (APSTA) kaba la don mynta la 43 snem naduh ba la seng ha ka 26 tarik u Jylliew, 1982.
Hapdeng ka jingïaid ban ai jingshakri bad ïatreilang na ka bynta ban weng ïa ki jingeh jong ki nonghikai skul Primary, ka APSTA ka la ïoh ruh dang tang uwei u General Secretary ha kine ki 43 snem kata lyngba u Babu FC Shullai uba dang kit ïa ka lyngkor kum u General Secretary haduh mynta, wat haba u la shongthait na ka kam, namar ka jingieid bad jingshaniah jong ki para nonghikai ïa u.
U Babu Shullai u la don bynta naduh nyngkong ban seng ïa ka APSTA ha ka 26.06.1982 ha kaba la jied ïa u kum u General Secretary ba nyngkong eh bad ka Kong Christina Sun kum ka President ba nyngkong ka APSTA.
Ka jingseng ïa kane ka seng ka dei na ka daw ba ki nonghikai kiba hap hapoh ka jingpeit ka KHADC kiba tip kum ki DCLP kiba don haduh 1022 ngut, kim shym la ïoh tulop kumba 5 bnai, bad ki 825 ki nonghikai Grant-in-Aid Lower Primary School ruh ki khlem ïoh tulop kumba 9 bnai ha kato ka por.
U Babu Shullai u la long uwei na ki nongprat lynti, bad ïeng kum u païa baskhem jong ka APSTA haduh kat kine ki sngi.
Hapoh ka jingïalam jong une u Babu ryngkat lang bad kiwei pat ki nonghikai khamtam kiba ïa kit ïa bah lang, shibun ki mat ki jura kiba ka APSTA ka la rah bad dawa, ki la urlong ha kine ki phew snem.
Ym tang ki mat jingdawa, ka APSTA lyngba ka jingïohi jngai ki nongïalam, ka la ïoh lad ruh ban thied jaka ban shna ïa ka ïing jong ka APSTA kaba long ruh ka shlem treikam jong ka seng.
Haba phai khyndiat shaphang ka ïing jong ka APSTA, dei ha ka 23.03.1986 ba kane ka seng ki nonghikai ka la ïoh ban thied ïa ka jaka kaba 5000sq ft ha Umkdait, Nongmensong, bad hadien bun snem kata ha ka 19.10.2001 la sdang ban tei ïa ka bynta ba nyngkong ka ïing jong ka APSTA ha katei ka jaka.
Hadien ba la ïaid 13 snem bad da ka jingkynshew pisa suki suki, ka APSTA ka la lah ban pyndep teng ïa ka bynta jong ka ïing ha kaba la ïoh ban pyndep ïa ka mala ba nyngkong (First Floor) ha ka 15.11.2014.
Kumta da ka jingtrei shitom lang ki para nonghikai, ka APSTA ka la lah syndon ban tei ïa ka ïing jong ka seng kaba kham heh ha ki 11 snem ha kaba la ïoh ban plie ïa kane ka ïing kaba la shna pynheh ha ka 16.12.2025.
Ha kane ka ka sngi, u Kongsan uba dei u Commissioner and Secretary ka tnat pule puthi, u Vijay Kumar Mantri, IAS u la plie ïa kane ka ïing ha ka jingdonlang u Rangbah Shnong ka Nongmensong, u Bah P. Warjri bad sakhi lang da kiba bun ngut ki nonghikai.
Ha katei ka sngi, la ïoh ïa ka jingkren pdiang burom na u President ka seng, u Babu Tony Fort War bad la ïoh ruh ïa ka jingbatai ïa ka history jong ka seng APSTA da u Babu FC Shullai General Secretary.
U Babu Shullai u la ïathuh kumno ka seng APSTA ka la mih 43 snem mynshuwa na ka daw ba ki nonghikai DCLP bad ki nonghikai Grant-in-Aid Lower Primary ha KHADC ki ïakynduh jingeh, bad u la pynkynmaw ruh ïa shibun ki jingeh ba ki nonghikai ki mad ha ka jingshakri jong ki kum ki nonghikai, hynrei namar ki jingïatylli bad ïatreilang ki la long kiba jop.
U Babu Shullai u la pynpaw ka jingkhublei ïa baroh kiba la noh synñiang ban thied îa ka jaka bad shna ïa ka ïing jong ka seng. U la ai khublei kyrpang ïa ki nonghikai kiba la shongthait na ka kam bad kiba la long ki dkhot nongseng (founder member) jong ka seng.
Shuh shuh u la ïathuh ruh ba ki nonghikai ki seng ïa ka APSTA namar ki dang ïai mad ïa ki jingeh kiba la ïakynduh 43 snem mynshwa, bad u kyntu ïa u Kongsan ban peit ba ki nonghikai kim dei ban mad jingeh bad ka Sorkar kam dei ban pynbor ïa ki nonghikai ban mih surok ban dawa ïa ka hok jong ki.
Ha katei ka sngi u Commissioner and Secretary ka tnat pule puthi, ha ka jingplie ïa ka APSTA Home, u la ïaroh ïa ka jingstad bad jingïohi jngai jong ki nongïalam jong ka seng ban don kum kane ka ïing na ka bynta ki nonghikai, bad u la kular ruh ban peit kyrpang ïa ka jingud jong ki nonghikai kumba la pynpaw naduh ka tulop kaba man u bnai, ka DA jong ki nonghikai, ka DCRG ka bhah ha kaba ki nonghikai kiba la shongthait ki dei ban ïoh, ka MEG kaba dang dei ka mat ïatai.
La ïoh ruh ka jingkren na ka Kong Vegonia Nongpluh kum Assistant General Secretary jong ka seng bad kaba long ruh ka Treasurer ka building committee. Ka Kong Nongpluh ka la ïaroh ïa baroh ki nonghikai na ki unit ba pher bapher kiba la noh synniang ban pyndep ïa ka bynta kaba ar ban tei ïa ka APSTA home.
La ïoh ruh ka jingkren na u Bah P. Warjri kum u synbud kongsan uba la ai jingïaroh ïa ka jingïohi jngai jong ka Association ban don ka office bad kane ka iing ka la long ka jingmyntoi.
Ha kane ka sngi la wan rwai sngewtynnad ruh da ki khynnah skul ka Byrki Govt. L.P School Umdoh-lun. Kine ki khynnah skul ki la pynpar ñiangkhriat ïa baroh kiba don ha ka jingïalang bad baroh kiba don ki la ai ka jingïaroh ïa u Babu B. Khardewsaw, u ba la lah ban pyntbit ïa ki khynnah haduh katne wat la ki long ki khynnah nongkyndong.