M P ka Shillong, ula pyndonkam hok ïa ka bhah jong u, ha kane ka dorbar tlang kaba mynta bad kata ka long, ba ula leit rah ïa ki mat kiba kongsan bha bad kiba ka sorkar U Conrad Sangma, kam nud satia wat tang ban saham ruh bad kitei ki kynthup ïa ka jingshah nioñ kput ki trai shnong jong ka Lapangap ha ki jaitbynriew Karbi bad nangta sa ka jingthombor jong U Vice Chancellor ka North Eastern Hills University (NEHU).
Nalor katei ka mat, U MP, ula tied tyngeh ruh, halor ka jingleh ñiew beiñ jong ka kompeni shna surok ka NHIDCL ïa ki trai shnong jong ka thaiñ Riwar, da kaba ka pyntuid da ka jaboh jabaiñ suda sha ka wah Umngot, kaba dei ka pliang ja jong ki nongshong khappud.
Haba peit na kitei ki mat, la ïohi, ba U MP, ula thlieh ïa ka jing bym lerkam jong kane ka sorkar, la kumba thlieh diengïap syndon bad haduh ba kin da lwet tyngeh, ha ki kyntien kiba ki la shah bom ha ka dorbar bah jong ka ri India.
Kane keiñ, kata kaba ki ong, ka synshar paidbah, ha kaba ki MP, ki leit ban kren ïa ki ishu jong u paidbah, ym ba kin leh politik bad leh myrsiang sadew, da kaba ki leh lymbit hapoh Parliament, ha kaba ki shu pyndem tdong kat shaba poi.
Lada ïakren ïa ka surok Dawki, ka jingshisha ka paw shai, ba ka sorkar jong U Conrad Sangma, ka la pheil jubor justi, namar ba wat haduh ba ki la ïap kumba 7,8 ngut ki mynsiem briew, hynrei kim pyrwa eiei bad ki ïakren beiñ ruh pynban halor kiba kum kitei ki jingjia.
Halor ka Lapangap, la ïohi, ba ki heh sorkar MDA, ki pyndem toiñ ïalade, ha kaba kim nud ban ang wat tang shi kyntien halor katei ka jingjia bad kiba pynjem ïa ka jing ïakynduh, ka dei lyngba ka jingïakhun ki trai shnong bad ki riew paidbah, hynrei u Myntri Rangbah lem bad u Myntri kam Pohïing jong u ki pyndem toiñ ïalade, ha khmat ka jingthombor jong ka sorkar Assam.
Haba peit ïa ka NEHU lei lei, ym ïohi ïa uwei ruh u Myntri Sorkar lane u Myntri Rangbah, ba kin nud ban ang ïa la ka jong ka shyntur, hynrei dei tang ki nonghikai, ki samla pule bad ka dorbar shnong Mawlai, kiba nud ban pyni bor ïa une U Vice Chancellor, uba la pynjot thiaw ïa ka kyrdan jong ka University.
U MP, um pat tih lut ïa ki ishu bapher, ba kynthup ïa ka jingai jingbit ïa ki dkhar ba kin tei karkhana dewbilat sha Jaiñtia Hills, kaba pynkheiñ ïa ka kyndon jong ka Sixth Schedule, ka jingkurup lut ki dkhar ïa ki jingtrei kiba heh ba heh jong ka sorkar bad sa shibun kiwei pat, kiba pyni, ba kane ka dei shisha tang ka sorkar jong ki kam sngewbha bad ka sorkar ot ribon bad ha kaba kut, ka mih ka jingong “Haba la synshar ka pisa ka duh noh ka hok bad ka jingshisha,” bad ka dei kane keiñ kaba ki nongthep vote jong ka jylla, ki hap ban kitkhlieh.
Nangta haba phai pat sha ka kam jong ka inner line permit ha kaba kane ka Sorkar Jylla ka la shu pynbeij kai ïa ki paidbah tang ynda la jan ka elekshon ba ki sa leh mynleh leit ïakynduh ïa ki Myntri Sorkar Pdeng ban ïakren ïa kane ka mat kaba hadien ba ki la wanphai kin ïathuh ia kajuh ka daw kata ban ba ka Sorkar Pdeng kan hap shi hap bishar shwa sa da ki snem halor kane ka mat ILP kaba nalor kaba la dep ban ïakren da ki snem naduh mynshwa.
Nangta haba phai pat sa ïa ka mat jong u pud u sam ruh kumjuh la shu kut tang ha ka jingïakren da ka ktien ha kaba kane ruh kam ipoi shano shano ruh.
Kaba pynsohsat bad pynbitar eh ïa ki paidbah nongshong shnong bad khamtam eh ïa ki samla kadei ka issue jong ka them metor ha kaba kane ka kam mynta ka la iaid la palat 7 ne 8 snem kaba ka Sorkar Jylla kam pat leh eiei.
Kane ka Sorkar jylla kam tieng imat wat ïa ka iingbishar ne Ïingkashari kaba la pynmih hukum manla ka por halor kane ka kam jong ka them metor.
Haba phai sha baroh ki liang la ïohi ba kane ka Sorkar ka la pulom lut nadong shadong bad kaba kane ka Sorkar ka jop kadei tang ha ki kam sngewbha, kam tamasa bad ki jingpynlut kai ïa ka pisa u paidbah, katba ka tulop kaba dei ban siew hok ïa ki nonghikai pat ka pynsah da ki snem ne ki bnai ha kaba ka la pynlong ruh ïa ki nonghikai ba kin hap mih sha surok ban rah placard ban hylla bad ban dawa ïa la ki jong ki hok.
Tangba kaba lyngngoh pat ka long haba la poi ka snem thep vote pat ki paidbah ki jied shi jied ïa ki juh ki briew ne ia kajuh ka party wat hadien ba ki la shah leh beiñ ha baroh ki 4 snem shiteng.
Kaba donkam mynta ka long ba ki paidbah ne ki nongshong shnong kin hap ban sngewthuh ne hap don kiba pynsngewthuh namar ka beij san spah ne ka pisa 1 hajar ha ka shi sien san snem kan ym lah ban poi shano shano ruh, hynrei tang ka jingpynjot suda.
