Jowai, Nohprah 21: Ka Byndihati SC kala long ka lahduh ha ka lympung phutbol jong ki kynthei bala pynïaid da ka East Jaiñtia Hills District Football Association (EJHDFA) ïa kaba la tip kum ka Women’s League 2025 hadien ba ka la jop ïa ka jingïakhun phainal kaba la long ha ka sngi Saitjaiñ, 20 tarik u Nohprah, ha madan Artificial Turf, Diengshynrum, Khliehriat East Jaiñtia Hills District.
Ha ka jingïakhun phainal ka Byndihati SC ka la lah ba kan pynliem noh ïa ka Dkhiah West SC lyngba ka tie breaker ban pynskhem ïa ka nam jong ki kum ka lahduh ha kane ka lympung mynta u snem.
Baroh arliang ki long kiba ïaryngkat bor bad ka jingïalehkai ka la long kaba ïakhaid haduh katta katta, ha kaba ym shym la don satia ba lah ban pynkhihjar (0-0). Kane ka jingbym lah ban ïa thep kol ka la bteng naduh ka jingïakhun jong ka kylla step, kumjuh ruh ha ka kylla miet kaba la pynjlan ïa ka jingïakhun phainal shaduh ka Extra Time.
Hynrei wat ka Extra Time kam shym la lah satia ban pynïakhlad ïa ka jingïakhaid. Kumta naka liang ki bor pynïaid kila hap ban pynïakhun noh da ka jingïashut Tie Breaker ban rai ïa ka nongjop, bad dei hangne ba ki thei ïalehkai jong ka Byndihati SC kila lah ban pynthikna ïa ka jingjop da 4-3 pyrshah ïaka Dkhiah West SC.
La wan ban sakhi lang ïa kane ka jingïakhun phainal da u Bah Mehiwot Shadap uba dei ruh u Working President ka EJHDFA kum u Kongsan, ha ryngkat ka jingdonlang u General Secretary Bah James Sutnga lem bad ki dkhot bad ki nongkitkam ka Youth Development Committee.
Ha ka jingïalang sam khusnam la ïoh ruh ban ithuh ïa ki katto katne ki thei ïalehkai ba kynsai jong kane ka lympung, ha kaba ka Makrisha Songthiang ka la ïoh khur ïa ka khusnam Best Player, katba ka paralok ba ïalehkai ryngkat na ka kynhun (Byndihati SC) ka Priyanka Latam ka la ïohpdiang ïa ka nam Best Goalkeeper.
