Shillong, Nohprah 21: Ka Sporting United bad ka Risers CC ki la jop ïa la ki jong ki jingïalehkai ha ka lympung Cricket League 3rd Division 2025 ba la pynïaid da ka Shillong Cricket Association, kiba la long hynne ka sngi U Blei.
Baroh ar tylli ki kynhun kiba la khur ïa ka jingjop kidei kiba la sdang tied nyngkong, ha kaba ka Sporting United ka la jop suk da 86 ron ïa ka FSB, nangta ka Risers ka la jop da tang 9 ron ïa ka Young Fighter CC.
Hadien ba jop ïa ka jingkynting pisa (toss) ka Sporting United ka la shimti hi ban tied bad ka la lah ban buh ïa ka thong kaba khlaiñ, da kaba kamai 224 ron haduh kaba kut jong ki 20 ober bad hap 9 wiket. U ba la lamkhmat ha ka tied u dei u Mani Sharma (66 ron naki 45 bol).
Watla u Rudrajeet Bhattacharjee ka FSB, u la lehkai bha ha ka liang ka boling da kaba khur 3/34 naki 4 ober, hynrei haba ka kynhun ka wan ban beh ïa ka thong ka la ïohlad ban kamai tang 138 ron na ka bynta 8 wiket haki 20 ober, kaba la pynlong ïa ka Sporting United ban jop suk da 86 ron.
U Deepak Chettri u la long u namtam napdeng ki rangkawang bol jong ka Sporting United, da kaba pynhap 5 wiket bad ailad tang 22 ron naki 4 ober kaba pynlong ïa u ban khur syndon ïa ka nam ‘Player of the Match’.
Ha ka jingïalehkai kaba bud, ka Risers CC ka la jop ïa ka jingkynting pisa bad ka la rai ban tied nyngkong, ha kaba ka la lah ban kamai 119 ron shuwa ban kut ki 20 ober bad khyllem 9 wiket. U Raja Gurung u la lamkhmat ha ka tied da kaba kamai 22 ron naki 24 bol. Katba u Pradeep Purkayastha jong ka Young Fighter u la khur 2/14 naki 4 ober.
Haba pyrshang ban jubab ka Young Fighter ka la duna tang khyndiat ban poi sha ka thong hynrei ka la lap ba hap noh baroh 10 ngut ki nongtied na ka bynta 110 ron haki 19.1 ober, kaba la pynlong ïa ka kynhun ban sah dien da 9 ron.
Ha kaba kut u Kartik Thapa u la ïoh khur ïa ka nam ‘Player of the Match’ da kaba pynhap 3 wiket bad ailad tang 21 ron naki 4 ober.
Haba phai pat sha ki jingïalehkai kiba la long ha ka sngi Saitjaiñ, ka Uplifter Alternative ka la kamai 133/6 haki 20 ober ban pynliem ïa ka Sales Xl da 33 ron, hadien ba ki nongtied jong ka Sales Xl kim shym la lah ban kynjoh ïa ka thong ba la buh, da kaba kamai tang 106 shuwa ban khyllem baroh 10 wiket naki 17.4 ober.
Uba la lamkhmat ha ka tied na ka bynta ka Uplifter Alternative udei u Edward John Kharkami (35 ron naki 34 bol) hynrei ka nam Player of the Match la khur da u Raju Gurung na ka bynta 12 ron kiba u la kamai bad ki 4 wiket kiba u la weng ha ka boling.
Ha ka jingïalehkai kaba ar, ka Sawmer CC ka la pynliem noh ïa ka Momentum CC da 19 ron. Watla ka Sawmer ka la buh ïa ka thong kaba duna, kata da tang 84 ron namar ba khyllem baroh 10 wiket naki 13.4 ober hynrei ki nongkawang bol jong ka kynhun ki la pyndep ïa ka kamram da kaba weng noh baroh ki nongtied jong ka Momentum tang na ka bynta 65 ron.
Ha kaba kut u Rakesh jong ka Sawmer, u la ïoh ban khur ïa ka nam ‘Player of the Match’ da kaba kamai 34 ron ha ka tied bad khur 3 wiket.
