Shah prong ka ïing ha Nongsohlait, lute ïa ka Ksiar bad jingdon jingem palat lak tyngka

Nongstoiñ, Nohprah 17: Kawei ka ïing kaba don ha ka shnong Nongsohlait West Khasi Hills, ka shnong kaba don ha lynti ban leit sha Dewlynnong Nongkhnum, ha ka sngi balang, ka la shah prong ha u riew runar bad shah tuh kumba palat shi lak tam ki jingdon jingem, ba kynthup ïa ka ksiar bad kiwei kiwei ki tiar ïing tiar sem.
U Bah Fullmoon Thabah u kpa jong kane ka ïing haba pyntip ha u nongthoh khubor, u la ong ba kane ka jingjia ka jia ha ka por kumba 3 baje ei ei ha katei ka ïing. U la ong ba ki khun ki la mih na ïing ha ka por 2:30 ban leit thied jingthied sha iew Nongstoiñ. U la ong ruh ba ka khun khatduh ka la ïohi malu mala ïa uwei u briew u ba ïaid sha marjan ba don ka ïing tangba kam poi pyrkhat ba un dei u riew sniew.
Hynrei, ha ka por 4 baje ei ei u la ïoh jingtip na ka khun ba ka ïing ka la shah prong ha u runar u ba la pyndonkam da ki nar kum ki lyngka ban pynpait ïa ka tala. La ong ba imat mar ïa ïoh ban rung shapoh u la pynpra ïa ki jaiñ ki nep kiba don ha duli buh jaiñ bad u la ïoh ban rah ïa ki jingdeng ksiar kiba shong dor palat 80 hajar tyngka.
Nangta la ong ba u la pynsaphriang ïa ki jaiñ ki nep ha madan haduh bym ithuh shuh, ym tang katta hynrei shwa ban phet u da bam lut ploiñ ïa ka ja ka jyntah kaba don ha katei ka ïing.
Na ka liang u Bah Fullmoon Thabah, ha ka por janmiet u la leit ban ujor da ka ejahar sha ki pulit jong ka Nongstoiñ Sardar Police Station, da ka jingkyrmen ba ki pulit kin ïoh ban thwet bad ïoh kem mardor ïa u briew ba donkti ban tuh ban thiem ha ka ïing jong u.
U Bah Fullmoon u la ong ba u runar imat u lah ban dei na ki thaiñ Nongstoiñ. Tangba haduh mynta ym pat lah ban pynthikna khamtam ba ki pulit ruh ki dang ïaid la ka jong ka kamram ban ïoh kem ïa u runar.