Nongpoh, Nohprah 17: Ban pynïaid beit ïaid ryntih ïa ki kam synshar khaddar hapoh ka Elaka Nongpoh Sirdarship na ka bynta ka jingmyntoi ki khun ki hajar, ka Khasi Hills Autonomous District Council (KHADC) mynta ka sngi ka la lah ban pynskhem ïa u Bah Lui Star Lyngdoh kum u Acting Sirdar ba un peit un khmih shipor ïa ki kam sysnhar khaddar hapoh kane ka Elaka Nongpoh Sirdarship ha Ri Bhoi District.
Ïa kane ka jingpynskhem bad pynspong la pynlong ha phyllaw ka ophis ka Elaka Nongpoh Sirdarshi bad u u Executive member ba Incharge ïa ka tnad Elaka ka KHADC u Bah Denzil Raynard Chen u la shim ïa ka bynta kum u kongsan ban pynskhem bad ban pynspong ïa u Bah Lui Star Lyngdoh kum u Acting Sirdar ka Elaka Nongpoh Sirdarship ha Ri Bhoi.
La sakhi lang ruh ha kane ka sngi da ka jingdon lang u MLA ka Umsning u Dr. Celestine Lyngdoh, u MDC ka Umroi bad u EM ba dei peit ïa ka Water resources and fisheries ka KHAC u Bah Isynei Hinge, ka MDC ka Nongpoh ka Kong Rona Khymdeit, ki Lyngdoh na ki Raid ba hap ha ka Elaka Nongpoh Sirdarship bad kynthup ruh ki nongïalam seng bhalang bad ki khun ki hajar ka Elaka Nongpoh Sirdarship.
Kum u Acting Lyngdoh ka Elaka Nongoh Sirdarship, u Bah Lui Star Lyngdoh, u la pynpaw ïa ka mynsiem jong ka jingkmen ba ki la bynshet ïa kane ka kam kum u Acting Sirdar bad u la kular ruh ban ai kata ka jingsynshar kaba khuid ïa ki khun ki hajar bad ruh ban ïa trei ryngkat ryngkat bad ki paidbah.
Ha kawei ka bynta, u la khot la wer ruh ïa ki khun ki hajar, ki longsan ki mansan, ki nongïalam Shnong bad ki Nongïalam Raid ba kin ai ka jingïatrei lang bad ka thong hi ka long ban kyntiew ïa ka long briew ka man briew bad ruh ban ai kata ka jingsynshar kaba khuid ïa ki khun ki hajar.
Ha kane ka sngi la ai jingkren ruh da u Executive member Incharge ka Elaka ka KHADC u Bah Denzil Raynard Chen bad u Dr.Celestine Lyngdoh MLA ka Umnsing, ha kaba ma ki ruh kum ki nongmihkhmat paidbah ki la kyntu ban don tang kata ka mynsiem jong ka jingïatrei lang bad ki paidbah, namar ka thong ban pynskhem ïa u Acting Sirdar ka long ban ai ka jingshakri sha ki paidbah kaba long katkum ka jingdonkam bad ruh ban kyntiew ïaka hok long briew man briew ki khun ki hajar.
