Shi Lak tyngka ai u Bah Sanbor sha ka jaka ri khun swet jong ka Ferrando Transit Home

Shillong, Nohprah 16: U MLA ka BJP uba dei ruh u Myntri Sorkar u Bah Sanbor Shullai u la noh synniang T. 1,00,000 lak da ka jingieit bad ka jingiatrei lang bad ka Ferrando Transit Home cum Children Orphanage Home Mawdatbaki Mawlai Shillong kaba la leh ia ki kam ba bha bad ka kam isynei.
Ha kane ka jingleit jong u Bah Sanbor ka long ruh shi bynta jong ka jingrakhe Christmas bad snem thymmai jong kane ka jaka ri khun swet ia kaba la pynlong ha phalor jong kane ka jaka ha ryngkat lang bad ki 87 ngut ki khynnah.
Haba kren ha kane ka jingialang u Bah Sanbor Shullai u la ai jingiaroh ia baroh ki dkhot bad ki nongtrei jong kane ka jaka kiba la pynlong ia kum kane ka jingrakhe kaba kit jingmut bad kaba pyndap da ka jingkmen ha ka jingim jong u ban ioh ia don bynta lang ha kane ka jaka.
Na ka liang jong u Bah Sanbor u la sot ruh ia ka jingkren na ka jinghikai ka kot bakhuid ba baroh ki kynja ba im ha kane ka pyrthei, la ki long ki mrad, ki sim ki doh um doh wah bad ki khniang, la thaw tang da kawei ka mynsiem jong u Blei bad kumba ong ka ktien bakhuid “ka jingshakri ia ki briew kadei ka jingshakri ia u Blei”.
Ia kane ka prokram la sdang da ka jingrwai Khristmas ba la rwai da ki khynnah jong kane ka jaka ri khun swet bud pat sa ka cultural programme bad ka drama shaphang ka jingkha ia u Jisu Khrist ia kaba la ak da ki khynnah bad ki jingrwai Khristmas bad ki jingiakop bapher bapher.