Nongstoin, Nohprah 14: Ka Seng Samla Sports & Cultural Club Mynni Mawbri West Khasi Hills District, ha ka 10 tarik u Nohprah, 2025, ka la pynlong ïa ka jingïalang kaba kyrpang ban pynkup burom ïa ka Samla Kynshewlypa Mawlieh kaba na ka shnong Mynni Mawbri Nongstoin Syiemship, hadien ba kane ka wanrah ïa ka nam ka burom ym tang ïa ka shnong ka thaw, ka dong ka thaiñ hynrei ïa ka jylla hi baroh kawei.
Ban shu pynkynmaw, ka samla Kynshewlypa Mawlieh ka la leit ban ïashim bynta ha ka ‘17th Junior National Micro Futsal Championship 2025’ ha nongbah Delhi kaba la pynïaid da ka Indian Futsal Federation bad ka la mihkhmat na ka School Joel Gatphoh Memorial Synod Hr. Sec. School Kynroh Nongkynjang, Nongstoin.
Ha katei ka jingleit ïashim bynta, ka samla Kynshewlypa Mawlieh ka la lah ban ïalam ïa ka skul kaba mihkhmat ïa ka jylla Meghalaya ban poi sha ka jingjop da kaba rah ïa ka nam lahduh.
Kumta na ka liang jong ka Sports Club kam lah khlem da pynpaw ïa ka jingsngew kmen bad sarong halor kane ka jingjop, bad ha ka jingïalam jong u President bad Secretary ki la ïoh ban pynkup burom ïa kane ka samla da ka jaiñ thohriaw stem bad ka momento ha ryngkat ka jingkren ai mynsiem bad kyntu kynpham na u Secretary ka sports club Bah Balambokstar Dkhar ha ka jingsakhi lang jong ki kmie ki kpa bad kiba ha ïing ha sem.
La ïoh ruh ka jingkren ba lyngkot na i samla Kynshewlypa Mawlieh bad na u kpa jong ka uba la pynpaw ka jingsngew nguh sngew burom ïa ka sports club ba ka la ithuh kyrpang ïa I khun jong I lyngba kane ka jingpynkup burom.
Kane ka long katkum ka kyrwoh khubor na u Assistant Secretary ka Seng Samla Sports and Cultural Mynni Mawbri, Bah Kyrshan Rimiat.
