Guwahati, Nohprah 13 : U Secretary, Tnad Water Resources, River Development & Ganga Rejuvenation (DoWR, RD & GR), Tnad Jal Shakti, u V.L. Kantha Rao u la pyniaid ïa ka jingïalang peit bniah ha Brahmaputra Board Headquarter ha Guwahati mynta ka sngi ban bishar bniah ïa ka jingïaid shaphrang jong ki projek kiba ïadei bad ki tyllong um ha kylleng ki Jylla kiba don hapoh ka thain Brahmaputra bad Barak Basin. Ha kane ka jingïalang la sakhi ïa ka jingïashim bynta naduh ki heh ophisar jong ki tnad Water Resources jong ka Arunachal Pradesh, Assam, Manipur, Meghalaya, Mizoram, Nagaland, Tripura, Sikkim bad West Bengal, ryngkat ki ophisar na ka Tnad sorkar pdeng bad ki seng ha ka thaiñ jong ka DoWR, RD & GR, kumjuh ruh ki ophisar jong ka Brahmaputra Board.
Ki jingïakren ki long halor ka jinglong jingman jong ka jingpyntreikam ïa ki jingai jingmut jong ki river basin Master Plan da baroh khyndai tylli ki jylla ba don ha ki jaka ba don ki wah, ka jingïaid shaphrang jong ki kam ba la shim da ka Brahmaputra Board, ka jingïaid shaphrang ki kam bad ka pisa tyngka jong ki projek ba dang ïaid hapoh ka Tnad, bad ka jingpeit bniah ïa ki jingtyrwa jong ki jylla ba la aiti sha ka DoWR, RD & GR.
Ki heh sorkar jylla ki la ai jingtip halor ki sienjam ba la sdang ban pyntreikam ïa ki jingai jingmut hapoh ka Master Plan, katba u Secretary u la ban jur ïa ka jingdonkam jong ka jingïatreilang kaba khlain hapdeng ki jylla na ka bynta ka jingpyndonkam ïa ka um ha ka rukom ba la pynïasoh lang. U la kyntu ban pyndep ha ka por kaba biang ïa ki projek kiba dang ïaid shakhmat, ban pynbeit lypa ïa ki jingeh, bad ban bud ryntih ïa ki por ba la buh hakhmat eh na ka bynta baroh ki kam ba la kyrshan hapoh ki kam jong ka Sorkar pdeng bad ki skhim ba la kyrshan da ka sorkar pdeng.
Haba pynkut ïa ka jingïalang, u Kantha Rao u la ban jur ïa ka jingdonkam ban don ka jingïatreilang jong kito kiba don bynta ha kane ka kam ban pynthikna ïa ka jingpynroi kaba neh bad kaba seisoh na ka bynta ki kam kiba ïadei bad ka jingkyntiew ïa ki tyllong um ha ka Brahmaputra bad Barak Basin. U la pynthikna ïa ka jingkyrshan ba pura ïa ki sienjam ban kyntiew ïa ki tyllong um ha ka thaiñ bad bthah ïa ki ophisar jong ka tnad sorkar pdeng ban ïarap ïa ki jylla jong ka thaiñ shatei lammihngi ha kaba pynkhreh ïa ki jingtyrwa na ka bynta ka projek ban ïoh ïa ki jingmyntoi hapoh ki skhim bapher bapher jong ka Tnad. Hashuwa kane, u Secretary u la leit jngoh ïa ka Brahmaputra Board complex ha Basistha bad plie paidbah ïa ka jaka pynlong jingïalang ba la shna thymmai kaba la saindur khnang ban kyntiew ïa ki jingïamir jingmut lang. (PIB)
