Shillong, Nohprah 13: Ka sngi baar jong ka Winter Tales 2025 ka la pynim biang ïa ka Wards Lake ha kaba ki la don ki prokram bapher bapher kiba pynneh pynsah, ki prokram ïathuh khana bad ki jingiasam ki jingtip hapdeng ki riew shemphang.
Ka phang jong kane ka Tamasa, ka dei ‘Nurture’, ka la ïeng pdeng kum ka jaka pyni ïa ki sap ki nongshong shnong, ki jingkongsan ki jingïakren, bad ka ‘Go Green Awards’ kaba long ka dak ban ai burom ïa ki nongri nongsumar ïa ka sawdong sawkun bad ka kolshor.
Ha kane ka tamasa ki la don ki kyntien ba thoh kiba la long ka pdeng ha kaba la pynbud da ka jingpynlait ïa ka kot da ka MLCU Press, kaba kyrteng ka Taptung Tangthu: Paite Folktales na ka bynta ki khynnah, Rain U Slap, bad Picnic and Pine Needles. U photojournalist Pablo Bartholomew u la wanrah ïa ka Father & Son, Richard bad Pablo Bartholomew – ïa ka Affinities, kaba pyni ïa ka jingkren briew lyngba ki dur kiba la bun bun snem.
Ka Go Green Awards ka ithuh ïa ki jingnoh synniang sha ka kam pynneh ha kaba Ebor Tariang, P. Cooper Kharluki, bad Cleric Jayden Wanniang ki la ïohpdiang ïa ki khusnam halor ki dur ki dar, ka art, bad film.
Hadien ki award la pynbud sa ka jingsam ïa ka cheque T. 10,000 uwei uwei.
Na ka liang Ilamon Thangkhiew, local artisan, la ïaroh ïa ka jingkyrshan jong ka sorkar ïa ki kam jong ka ban pynneh pynsah ïa ki sap ki mynbarim bad kumjuh ruh ban kyntiew ïa ki sap ki phong ki nongshong shnong.
“Kane ka festival ka la kiew bha ha kine ki snem ba la leit ha kaba ka la don ka jingkiew jong ki nongwan jngohkai kiba la ïaroh ïa ki jingpyninam jong ki tiar kitar,” ka la ong.
Ka Winter Tales 2025 ka la bteng ban kyntiew ïa ki kam pynneh, ka kolshor bad ka jingïalong kawei ha ka kynhun jaitbynriew, ka ai ka rynsan ïa ki riew shemphang, ki master craftsman, bad ka jingrakhe ïa ka jinghiar pateng.
