Khliehriat, Nohprah 12 : Ki paidbah nongleit nongwan kiba iaid lyngba na ka surok bah national highway na Khliehriat ter ter shaduh Chehruphi ki kynduh jingeh haduh katta katta ha ka leit ka wan na ka daw ka jingjur palat ka jingdheng kali ha surok bah national highway kaba naduh Khlihriat ter ter shaduh Chehruphi bad ka daw ka ka dei namar ba ka ka NHAI ka pyntrei ïa ka surok bad ki nala tuid um kiba heh na ki bun tylli ki jaka.
Ka jingdheng kali ka la buh jingeh ym tang ïa ki nongleit nongwan hynrei ka wanrah ruh ka jingduh nong ïa kiba ñiah kali kamai khamtam haba dei ki sngi iew namar ka jingsahkut ha ka jingdheng kalai kane ka la ktah ruh wat ïa kito kiba briew kiba donkam ban beh por ban pyndep ïa ki kam ki jam.
Ka la mih ka jingbynñiaw bad jing ud ruh na ka liang ki paidbah namar kane ka jingpyntrei ka NHAI ha kiba bun jaka bad ki la ong ba ha ka jingshisha ka NHAI ka la dei ban pyndep shwa kawei-kawei ka bynta haba shna ïa ki nala tuid um kiba heh hynrei ki nongtrei ka NHAI pat tang ha Khliehriat ruh ki pyntrei haduh ar ne lai jaka ha kajuh ka por na kata ka daw ka jingdheng kali ka jur bha khamtam ha Khliehriat, kane ka la buh jingeh ruh wat ïa ki pulit ba pyniaid kali ha kaba ki hap ban pyniaid ïa ki kali ha ki ar bad lai tylli ki jaka tang ha Khliehriat.
Ym lah ban len, ha kum kine ki bnai ka la dei ruh ka bnai ba ki briew ki bunkam bha ha ka ïa die ïa thied namar ka dei ka aiom ba pynkhreh ïa ka jingleh kmen Chrismas bad ki briew ruh ki bun bha ha kiba leit iew kum ha Khliehriat bad Ladrymbai bad kane ka jingpyntrei ka NHAI ha kiba bun jaka ka buh jingma wat ïa ki paidbah ba iaid da ka kjat ruh ha sor Khliehriat na kito ki jaka ba ka NHAI ka pyntrei.
