Ka pateng ban wan ka dei ban tip ïa ki kam riewshlur ki Longshwa

Shillong, Nohprah 12 : U Myntri Rangbah ka Jylla, Conrad K Sangma ha ka sngi Thohdieng u la ong ba ki pateng ban wan ki dei ban tip ïa ka khana ka jingim jong ki kpa tymmen jong ki lyngba ki khana, ki drama kiban pynkhie im biang ïa ka kam riewshlur jong ki longshwa.
Ïa kane u Myntri Rangbah u la kren haka jingrakhe ïa ka lyngkhuh sngi ïap kaba 153 jong u khlawait Pa Togan Nengminja Sangma kaba long hynne ka sngi ha Togan Park, Chisobibra, Williamnagar, East Garo Hills.
U Myntri Rangbah u la pynbna ruh ba ïa ka khana jong u Pa Togan Nengminja Sangma yn sa pynwandur bha na ka bynta ban pynrung pat ïa ka ha ki jingïalehkai bad ki drama bad pyndonkam da ki skul bad College. Shuh shuh u la ïathuh ruh da ka jingkmen ba ïa ka khana lyngkot shaphang u Pa Togan ki dang pynkhreh mynta.
Da kaba pynbna ïa ki sienjam ba thymmai jong ka sorkar, U Myntri Rangbah u la ong ba ki pynshlur ïa ki skul bad college ba kin pynlong ïa ki rynsan ïalehkai drama halor ka jingim jong ki khlawait. Ïa ka khana shaphang ka jingim u Pa Togan la pynkhreh mynta bad yn sa sam sha ki jaka pule khnang ba ki samla pule kin ïoh ban ak biang ïa ka jingim jong u.
Shuh shuh u ong ruh ba ka jingrakhe ïa katei ka lyngkhuh sngi ïap ba 153 ka pynkynmaw biang ruh ïa ki kam riewshlur ba u Pa Togan u la mih ban ïada bad ïakhun na ka Jaidbynriew Garo bad khamtam na bynta ka ri hi baroh kawei.