Shillong, Nohprah 12 : Ki la don haduh kumba 800 ngut ei ei ki nongïalam na ki party bapher bapher hapoh ka Nartiang Constituency ba kynthup naduh ka Congress bad VPP kiba la pynïasoh pura noh sha ka National People’s Party (NPP) ha kane ka sngi Thohdieng ha ka jingïalang kaba long ha Community Hall Wahiajer.
Ïa kine ki nongïalam ryngkat bad palat hajar ngut kiwei pat ki nongkyrshan jong kitei ki party la pdiang burom da u MLA ka Nartiang uba dei ruh ha kajuh ka por u Symbud Myntri Rangbah ka Jylla, Bah Sniawbhalang Dhar ryngkat ka jingdonlang ki nongïalam ka party, ki MDC ka party kumjuh ki MDC barim nalor kiwei kiwei.
Na ka liang u MLA haba kren bad ki lad pathai khubor hadien ba la dep ban pdiang burom ïa kitei ki nongïalam sha ka party, u la ong ba nyngkong u sngew kyndit ban tip ba kin don da ki spah ngut ki nongïalam na kiwei pat ki party kiba kwah ban pynïasoh sha ka party jong u.
La ïoh jingtip ruh ba kitei ki nongïalam ki dei na ki 73 tylli ki shnong kiba hap ha ka Nartiang constituency.
“Kine baroh ki la sdang ban paw naduh mar ïa dep ka elekshon MDC bad elekshop MP. Ki paidbah ka Nartiang constituency bad jong ka Rilum Jaintia hi baroh kawei ki la ïohi ba dei tang kane ka sorkar kaba peit bad wanrah ïa ka roi ka pa kaba shisha na ka bynta jong ki,” u la ong.
Haba jubab pat halor ka jingkylli, u MLA u la ong ba watla ka elekshon ka dang jngai sa kumba arsnem ei ei hynrei na ka bynta ki paidbah kiba la ïohi ïa ka jingkylla kim lah shuh ban ap haduh ban da poi katei ka por. “Dei na kane ka daw ki la pynpaw ba ki kwah ban wan pynïasoh noh sha ka NPP bad ban trei ryngkat ryngkat nangne shakhmat na ka bynta ka roi ka pa jong ka constituency bad ka thain hi baroh kawei,” u la bynrap biang.
Shuh shuh u ong ruh ba kum u MLA mynta la 18 snem, ka dei ka sien kaba nyngkong bad ka long ruh kum ka history ïa u ba watla ka elekshon ka dang jngai hynrei ki paidbah ki la kwah ban wan bad tyrwa ban ïatrei lang. “Ki la wan ban tyrwa ba ki kwah ban pynïasoh noh mynta mynta ban pynkhlain ïa ka party ym dei tang ha Nariang constituency hynrei na ka bynta ka rilum Jaintia bad ka jylla hi baroh kawei. Mynshwa kam pat ju jia kumne ba kin kyrpad ba ki kwah ban pynpaw sha ka pyrthei ba kin pynïasoh noh sha ka NPP.”
U ong ruh ba ki paidbah dalade hi ki la pynpaw ha ka jingïalang ïa ka daw ba ki hap ban mih noh na ka VPP bad kumjuh na ka Congress.
“Lada kren kumno kumno ruh ki paid ka Nartiang ki la stad bad ki tip bad ïohi ïa ki kam ba bha ba kane ka sorkar ka trei. Kim dei shuh kiba dang biej hynrei kiba la shai ha ka business, ha ka pule puthi bad ha ka liang baroh,” u la bynrap biang.
Ha kajuh ka por u ong ba ka jingrung jong kine ki nongïalam sha ka NPP kan ktah wat ha baroh kawei ka jylla namar kine ki lah ban trei ym tang ha rilum Jaintia hynrei kan ktah ïa ka sainpyrthei ha baroh kawei ka jylla.
Shwa kane la ïoh ruh ïa ka jingkren na ki nongïalam ba hakhmat na ki party bapher bapher kiba wan ban pynïasoh, nangta na u President ka NPP Nariang, Bah Hamkom Khyriam, na ki MDC jong ka party, ki MDC barim bad kumjuh na u CEM ka JHADC Bah Thombor Shiwat.
