Shillong, Nohprah 09: Ka Shillong Lajong ka la pynliem da kaba suk ïa ka Meghalaya Police da 2-0 kol ha ka jingïakhun semifinal kaba ar jong ka lympung SSA Champions Cup 2025, kaba mut ba ki nongkyrshan kin ïoh ban sakhi ïa ka jingïakhun final kaba ki angnud baroh shilynter hapdeng ka Nongkseh bad ka Lajong ha kane ka sngi Saitjaiñ.
U Iohborlang L Lyngkhoi (41′) bad u Deibormame Tongper (50′) ki la pynkhihjar na ka bynta ka Lajong ban pynkhyllem noh ïa ka MLP.
Haba phaidien, ka Nongkseh ka la jop ïa ka jingïakhun semifinal kaba nyngkong lyngba ka tie breaker da 4-3 pyrshah ïa ka Langsning hadien ba ka extra time ka la kut ha ka jingïakhaid da mar 2-2 kol. Ka Nongkseh bad ka Lajong ki ladep ban ïa aireng teng ha kane ka lympung, ha kaba baroh ar ki don ha ka Group B, bad ka jingïakhun ka la kut ha ka jingïakhaid da mar 1-1 kol. Namar kadei ka final, kawei ka klob kan sa long thikna ka nongjop ha ka sngi Saitjaiñ bad ka jingkhmih lynti ka long kaba khraw na ka bynta ka jingïakhun kaba shyrkhei hapdeng kine ki arliang mamla.
Ha kane ka jingïakhun, u Nister Roy Suting u la wanrah ïa ka jingïalehkai kaba kyrpang hakhmat kol na ka bynta ka MLP hynrei wat ma u ruh um shym la lah ban leh ei ei ban khanglad ïa ka Lajong kaba khlem sangeh ban pyrshang pynkhihjar.
U Nister u la ïoh ban kyntait ïa ka jingpyrshang jong u Iohborlang bad u Babysunday Marngar shuwa ban shah thep ha ka khyllipmat shuwa ban jam sha ka por shongthait na ka free-kick kaba la shut da u Iohbor.
Nangta tang katto katne minit ha ka kylla miet, ka Lajong ka la pynjlan ar shah ïa ka kol lamkhmat hadien ba ka jingpyrshang jong u Riborlang L Lyngkhoi kaba la shah khanglad ka la wanpoi ha ki kjat jong u Deibormame, uba la shim ïa ka kabu ban thep.
Na ka bynta ka kol bad ka jingïalehkai kaba kyrpang ban ïalam ïa ka kynhun kum u kapten, u Iohbor u la ïoh khur ïa ka nam ‘Hello Meghalaya Player of the Match’ bad ïa ka memento ryngkat ka cheque kaba T.5,000 na u Chief Secretary barim ka Meghalaya, u DP Wahlang.
Ka jingïakhun final kan long ha ka 13 tarik Nohprah (sngi Saitjaiñ) ha ka por 4:30 baje janmiet. Ka Lajong bad ka Nongkseh ki la pyndap ïa ka madan SSA Stadium ha ka por ba ki ïakynduh ha ka group stage ha ka 04 tarik Nohprah bad katei ka jingïakhun ka la long thik kum ka phainal. Mynta kin phaikhmat sha ka jingïakhun kaba khatduh ha kaba baroh arliang kin ïaknieh ïa ka burom ban long ki lahduh napdeng ki lahduh.
