SSA Champions Cup 2025: Rung final ka Nongkseh; pynliem da 4-3 ïa ka Langsning ha ka tiebreaker

Shillong, Nohprah 09: Ka SSA Champions Cup 2025 ka la wanrah sa ïa kawei pat ka jingïakhun kaba itynnat bad kaba shongkun hadien ba ka Nongkseh ka la lah ban pynliem noh ïa ka Langsning kaba ïalehkai tang 10 ngut da 4-3 ha ka Tiebreaker hadien ba ka extra time ha ka semifinal ba nyngkong ka la kut noh da mar 2-2 kol.
Kane ka jingjop ka la pynlong ïa ka Nongkseh ka kynhun ba nyngkong eh ban ïaid lyngba sha ka phainal jong ka SSA Champions Cup bad kan ïakynduh pyrshah ïa ka Shillong Lajong lane ka Meghalaya Police ha ka jingïakhun ïaknieh nam lahduh. Ka Lajong bad ka MLP kan ïakhun ha ka Semi final kaba ar ha kane ka sngi Balang ha ka por 4:30 baje janmiet.
Ban ïoh ïa ka jingjop, ka Nongkseh ka la hap ban wanphai da kaba tyngeh hadien ba ka la shah lamkhmat 2 kol tang hapoh 17 minit, ha kaba ka Langsning ka la pynkhihjar lyngba u Donlad Diengdoh (3’) bad u Dajiedlang Wanshnong (17’). Hynrei kam shym la slem ïa ka Nongkseh ba kan jubab, da kaba pynkhihjar lyngba u Mebankhraw Wahlang (21’) bad u Kynsaibor Lhuid (30’) ban pynïakhaid ïa ka jingïalehkai.
Ki nongkyrshan jong ka Nongkseh ki lah ban kham bun ban ïa ki nongkyrshan jong ka Langsning, hynrei ki la pynpaw ïa ka jingdon jong ki hadien ba u Donlad u la ïoh ban thep ïa ka kol ba nyngkong da kaba pyndei tiak da ka khlieh ïa ka bol ba la pashat na ka free-kick jong u Atlanson Kharmaw. Nangta u Dajiedlang u la pynjlan ïa ka kol lamkhmat da 2-0 na ka bynta ka Langsning hadien ba ïoh pdiang ïa ka bol pashat kaba thikna na u Chusrang Sangma.
Watla katta ruh, ka Nongkseh kam shym la kynrandien satia, pynban, ki la ïakhun shitom ryngkat ka jingtip ba ki dang don bun ka por ban pyrshang wanphai.
Ka la sdang ïa ka jingwanphai lyngba u Mebankhraw. Nangta hadien katto katne minit, ka jingpyrshang kaba na jngai na u Hardy Cliff Nongbri ka la tyllun sha u Kynsaibor, uba la khyrwit da kaba tyngeh ban phah ïa ka bol sha kol.
Ka jingjur ka jingïakhun ka la bteng ha ka kylla miet, watla ym shym la don shuh ba lah ban thep kol. Ka jingjur ka jingïakhun ka la long haduh katta katta, ha kaba katto katne ki nongïalehkai ïohpdiang ïa ka yellow card na u referee hynrei u Apborlang Kurbah, u la long uba sniew bok tam, hadien ba u la ïohpdiang arsien ki yellow kaba pynlong ïa ka Langsning ban shah pynduna sha ka 10 ngut.
Hadien ka extra time kaba shiteng kynta kam shym la lah ban pynïakhlad ïa ka jingïakhaid kane ka jingïakhun ka la jam sha ka penalty. Hangne, baroh arngut ki nongap kol- u Daraphun Talang ka Nongkseh bad u Rajat Paul Lyngdoh ka Langsning- ki la lah ban khanglad mar kawei hynrei dei ka Nongkseh bad ki nongkyrshan jong ka kiba la ïoh ban shadkmen hadien ba ka penalty ba khatduh jong ka Langsning kam shym la lah ban rung shapoh kol.
Hapdeng ka jingkmen, u Kynsaibor u la ïoh ïa ka nam Hello Meghalaya Player of the Match bad u la ïohpdiang ïa ka memento bad ka cheque kaba T.5 hajar na ka Adviser jong ka Sorkar Meghalaya ka M Ampareen Lyngdoh MLA.