SHILLONG, Nohprah 09: Hadien ba ka Nongkseh ka la lah ba kan pynliem noh ïa ka Langsning da 4-3 ha ka semi final kaba nyngkong, ka jingïaknieh ban ïoh rung sha ka wat ïakhun kaba khatduh ka sah satang hapdeng ka Shillong Lajong FC pyrshah ïa ka Meghalaya Police, ha kaba kine ki arliang kin rai ïa jaka ba khatduh mynta ka sngi Balang ha ka por 4:30 baje janmiet, ha madan First Ground-SSA Stadium, Polo.
Ka Shillong Lajong (runners-up ha ka SPL) ka la pyndep ïa ka jingïalehkai group stage ha ka kyrdan ba khlieh duh jong ka Group B, da kaba jop lai sien bad ïakhaid shi sien, kumjuh ka la long na ka bynta ka Meghalaya Police (runners-up ha ka First Division), ha kaba ka la pyndep baroh saw tylli ki jingïalehkai khlem da shah rem ha ka Group A, ban kamai 10 poiñ bad ban buh ïalade ha ka kyrdan ba ar.
Ka MLP, kaba dei ka kynhun ïalehkai First Division, ka la dep pynshisha ïa lade ba ka lah ban ïa aireng pyrshah ïa ki klob kiba don ha ka SPL, ha kaba ka la ïakhaid da mar 1-1 kol bad ka Langsning ha ka group stage. Te kumta, kan khmihlynti ba kan wanrah ïa kajuh ka sur ïalehkai pyrshah ïa ka Lajong mynta ka sngi katba ka dang ïakhun ban ïohrah ïa ka khusnam lahduh kaba nyngkong ban pynkut ïa ka aïom lehkai jong u snem 2025.
Kumta mano ban jop bad mano ban rem, ka rai hi kan dei mynta hi pat ka sngi, kaba hangne wat u paidbah u long lem u nongïarap ïa la ka kyhnhun ba kin bteng ban jam sha ka wat ïakhun kaba khatduh ka ban long pyrshah ïa ka Nongkseh.
