Nongkyna, Nohprah 09: Ka West Khasi Hills District Wushu Association (WKHDWA) hapoh ka jingpeit jong ka Meghalaya Wushu Association (MWA), ka la lah ban shim ïa ka sienjam kaba nyngkong ban pynlong ïa ka “1st District Level Wushu Championship 2025” ha ka 05 bad 06 tarik Nohprah, 2025, ha Mars Secondary School, Nongkyna.
Watla kadei ka sienjam kaba nyngkong pynban ka la long kaba jop, ha kaba ki la don kumba 70 ngut ki nongïalehkai kiba la wan ïa shim bynta na kylleng ka Distrik.
Ha kasngi plie pyrda la ïadon lang ki riew pawkhmat kiba la shah khot sngewbha, ki nongpynïaid, ki coach, bad ki paidbah kiba wan peitkai kiba la ïalum lang ban ai mynsiem ïa ki khynnah kumjuh ruh ïa ki samla kiba la mihkhmat ïa ki Shnong bapher bapher jong ka Distrik.
Ka kynhun ïalehkai jong ka shnong Nongkyna ka la ïohrah ïa ka ‘Champion Trophy’ hadien ba ka la khur 57 poiñ, katba ka kynhun na ka shnong Kyllon Mathei ka la bud ha ka kyrdan ba ar (Runner’s Up) hadien ba ka la kamai 37 poiñ.
Ka jingthmu jong kane ka lympung ka long ban kyntiew bad pynshlur ïa ki khynnah samla ha ka kam ïalehkai, ka jinglong ryntih, bad ban phriang ïa ka jingim kaba koit kaba khiah hapdeng ki samla, katba ka ai ruh ka lad ïa ki nongïalehkai kiba dang mih ban pynpaw pyrthei ïa ka jingtbit jong ki bad ban ïoh rung sha ki rynsan ïakop kiba kham heh.
Haba kren ha ka jingïalang, ki nongpynïaid ki la pynpaw ka jingsngewnguh ïa baroh ki kynhun kiba ïashim bynta, ki referee, bad ki nongpynïaid na ka bynta ka jingaiti bad jingshimkhia jong ki ban pynroi ïa ka jingïalehkai Wushu ha ka jylla. Ki la kdew ruh ïa ka jingpyrshang kaba bteng jong ka WKHDWA ban pynroi ïa ki sap naduh kiba dang rit bad ban pynkhlaiñ ïa ka jingdon jong ka District ha ka kyrdan ïakop jong ka Jylla, ka ri bad ka pyrthei (Statelevel, national & international level).
Kane ka championship ka kynthup ïa ki jingïakhun ha ki kyrdan bapher bapher, ha kaba ki nongïashim bynta kin ïakhun ban ïaknieh ïa ki takma. Ki nongjop ha kane ka lympung kin ïoh ban mihkhmat ïa ka District ha ka State level Championship ka ban wan, ban sa pynlong da ka Meghalaya Wushu Association.
