Dang phah tohkit ka sorkar halor ka khubor shah btep im 3 ngut ki nongtih dewiong ha EJH : Dy CM

Shillong, Nohprah 08 : Ka Sorkar Jylla kala bthah ïa ki bor District ban leit tohkit bniah bad pynshisha ïa ka jingkam ba twa ka par dewiong bad ka jingshah btep im lai ngut ki nongbylla ha kane ka par ba tih thliew khnai ha East Jaintia Hills, shajan ka shnong Thangskai.
Haba ïakren bad ki lad pathai khubor ha ka sngi Nyngkong, u Symbud Myntri Rangbah ba khmih ia ka kam Pohïing (Police) u Bah Prestone Tynsong ula pyntip ba ka Sorkar kan dang ap ban ïoh ïa ka kaiphod halor kane ka jingjia.
“Ngim pat ïoh khubor eiei ïa mynta, tang ba nga la dep bthah ïa ki bor district ka East Jaintia Hills ba kin wad la ka dei kaba shisha ne em. Hynrei ïa mynta, ngin dang ap ban ïoh kaiphod halor kane” ong u Bah Tynsong.
Kane ka jingkren u Symbud Myntri Rangbah kala mih hadien ka jingkynnoh da ka BJP Meghalaya halor ka jingdon ka jingtih dewiong beaiñ ha ka Jylla. U Bah Prestone ula kular ba ka Sorkar kala leh ïa ki kam ban tehlakam ïa ka jingtih dewiong beaiñ bad kala shimkhia bha ban leh eiei ïa kane ka kam.
“ Ngan iathuh ia phi ba ngi trei barobor ia ka kam ban khanglad ia kane ka jingtih dewiong beain namar shano shano ba ioh jingtip ba ka don ka jingtih dewiong beain ki bor ka ain ki la hiar ban khanglad bad kane ka iai bteng beit man la ka sngi ngi ialeh katba lah ban pynthikna ba kan ym don kano kano ka jingtih dewiong beain ha ka jylla” Ong u Symbud Myntri Rangbah.
U Bah Prestone ula kubur ïa ki jingeh ban ïakhun pyrshah ïa ka jingtih dewiong beaiñ da kaba ong ba bun ki par ki dei kiba don sha ki jaka ba kyndong bha. “Hooid, ki don ki jingeh namar ki jaka kiba ngi hap ban leit, phim lah ban mutdur, kam don lynti ïaid. Phi hap ban shu ïaid kjat, kan shimpor ïa phi ym duna ïa ka san kynta, hynriew kynta nalor ka jinghap ban hiar ïa ka riat ka ram” ula ong.
U Symbud Myntri Rangbah ula ban jur ba ka Sorkar kala pyrshang katba lah ban khang ia ka jingtih dewiong beaiñ bad la bthah ïa ki bor District ba kin shimkhia bha ïa kane ka kam.