Khot ka JNC da ka jingïakhih ha ka 10 tarik ba pynkylla beaiñ ïa ki jaka ki riewlum

Khliehriat Nohprah 08 : Ka jingïalang ka Central Executive Committee (CEC) jong ka Jaiñtia National Council (JNC) kaba la shong kyrkieh hynne ka sngi 8 tarik Nohprah ka la shim ïa ka rai ban pynlong da ka jingïakhih paidbah ban pynpaw pyrshah ïa ka jingthmu ban tei ïa ka Shree Cement Integrated Cement Plant ha ka shnong Daistong, East Jaiñtia Hills.
Ka Seng ka la shim ïa kane ka rai hadien ka jingsngap jar jong ka sorkar ha kaba ïadei bad kiba bun ki jingujor kiba ïadei bad ka jingkynnoh ba la pynkylla beaiñ ïa ki jaka jong ki riewlum, bad kaba la pynkheiñ ruh ia ka Meghalaya Transfer of Land Regulations Act, 1971.
U President ka JNC u Bah Sambormi Lyngdoh haba kren ha ka jingpynbna lyngba ka video tang hadien katto katne por ba la wai ka jingïalang u la ong; “Mynta ka sngi ka 8 tarik Nohprah 2025, ka Executive Committee ka JNC ka la pynlong ïa ka jingïalang ba kyrkieh, bad ngi la poi sha kawei ka rai kaba shai bha. “Kumba ngi la maham naduh kaba nyngkong ba lada ym ïoh ïa ka jubab na ka sorkar hadien ba ngi la aiti ïa ki jingujor, ngin ym shong klikti bad ngin pynlong da ka jingïakhih ba tyngeh.”.
U President u la batai ruh ïa ka jingbud ryntih jong ki jingpyntip ba la phah sha ki ophis sorkar bapher bapher ha kine ki taïew ba la dep; Kata ha ka 28 tarik Naiwieng 2025 la aiti ïa ka jingujor kaba pura sha u Deputy Commissioner, EJH, bad na ka liang jong u ruh u la dep ban phah ïa ka shithi sha ki artylli ki tnad kata (MSPCB, SEIAA). Ha ka 3 tarik Nohprah 2025 ki shithi pan jingpynshai ba kyrkieh na u CEM ka JHADC. Ha ka 4 tarik Nohprah 2025 pat la phah ïa ka jingujor kaba bniah sha i Commissioner ka tnad Land Revenue and Disaster Management Department, Shillong.
“Hynrei, kaba sngewsih ka long ba haduh kine ki sngi ym shym la don kano kano ka jubab na kano kano ka bor synshar,” bynrap u President ka JNC.
Kumta ka JNC ka la pynbna da ka jingïakhih paidbah kaba heh ka ban long ha ka 10 tarik Nohprah 2025, hakhmat ka ophis u Deputy Commissioner ha Khliehriat, ka ban kynthup da ka jingrah plakad bad ki jingai jingkren.
Halor kane u President ka JNC u la khot u wer ïa ka jingïatylli bad ka jingshlur hapdeng ki paidbah nongshong shnong jong ka thaiñ.
“Ngi kyntu ïa ki nongshong shnong jong ki jaka ba shah ktah khamtam ia ki nongshong shnong ka Daistong bad ki shnong ba marjan kiba shah ktah na ka jingthmu ban seng ia ka Shree Cement ba kin ym shptieng namar ka JNC ka ïeng skhem bad phi bad ngi kyrpad jur ïaphi ba phin wan ban ïasnohkti lang bad ngi ha ka 10 tarik Nohprah,” ong u kyrwoh.
Nalor kata u la kyrpad ruh ïa ki paidbah na kylleng ka East Jaiñtia Hills ban kiar na kaba kynnoh iwei ïa iwei ne pynpaw ïa ki jingeh tang ha ki rynsan social media hynrei ban pyni ïa ka jingieid jong ki ïa la ka khyndew ka shyiap da kaba mih shakhmat bad kyrshan ïa kane ka mat ba kongsan kaba ktah ïa ka imlang sahlang, ïa ka khyndew ka shyiap jong bad ïa ka lawei ka jong ngi.