Ai khublei ka AKHAF ïa ka Sorkar Jylla namar ka jingshimkhia ban pynpoi ïa ki marbam
Mawkyrwat, Naitung 06: Ka All Khasi Hills A’chik Federation (AKHAF) Central Body ka la pynpaw ka jingaikhublei kaba kyrpang ïa baroh kiba la ïa don bynta bad kiba la ïaleh shitom ban pynpoi marbam sha ki katto katne ki jaka ne ki shnong kiba don ha East, South West, bad West Khasi Hills Indo-Bangla Border Area na ka daw jong ka jingshah ktah ha ki bor jong ka mariang ha kine ki khyndiat sngi.
Lah ban kdew ba ha 16 tarik u Jylliew, 2022 baroh ki nongshong shnong kiba don ha distrik jong ka South West Khasi Hills, East Khasi Hills, bad West Khasi Hills ki la dap da ka jingsngewsih namar bun ki ïing ki sem jong ki ki la shah rad ha ka jingtwa khyndew bad shah rong ha ka um saw, ki surok ruh ki la twa lut, bad ba ki paidbah ki la don hapdeng bun ki jingeh ha kaba wat tang ban dih ïa ka um kaba khuid ruh kim ïoh shuh, kumta ki paidbah ki la ud bad pynsngew ha ki bor ba dei ban leh ei ei lem halor kane ka bynta.
“Ha kitei ki tarik ba la kdew bun ki ïing kim don bam shuh, ki jaka ïew ruh ym don shuh, ym don surok shuh kaba pynïasoh ha ka ïaid ka ïeng, kim don jaka sah shuh ban rieh wat hapdeng u slap u ba jur la ka long ha ka por mynsngi ne mynmiet ruh bad la ong ruh ba ki katto katne ki longïing kim don shuh wat ki jaiñ ban phong namar ki ïing sah jong ki ki la khyllem na ka jingtwa khyndew”, ong ka kyrwoh.
Namarkata, ha ka kyrwoh khubor na u President ka All Khasi Hills A’chik Federation (AKHAF) Central Body, bah Cleafstar Ch. Marak u la pynpaw ka jingsngew-nguh bad ai khublei namar hadien ka jingai jingtip sha ki bor sorkar na ka bynta ki jingdonkam ba kyrkieh jong ki paidbah nongshong shnong na ka liang jong ki ruh ki la leh ïa kaba donkam da kaba phah ïa ki marbam mardih lem bad kiwei kiwei de ki jingdonkam lyngba ki helicopter.
“Khublei shibun, Myntri Rangbah jong ka Jylla Meghalaya, Conrad K. Sangma, ki Deputy Commissioner’s, ki Police Department, ki BSF, ki MLA, ki MDC, u Ex-MLA u M.M. Danggo bad ki kynhun sengbhalang, bad kumjuh ruh ki nongïalam Balang kiba la noh shibun ki jingïarap ha ka por kaba kyrkieh eh”, pynkut ka kyrwoh na u President.