Mawkyrwat, Naitung, 06: Ka Mawlieh Upper Primary School bad ka Jakrem Presbyterian Higher Secondary School ki long ki ar tylli ki kynhun ki ban sa ïaknieh ïa ka man jingjop jong ki khynnah shynrang ba 14 snem ha ka lympung ïalehkai jong ka South West Khasi Hills District Level Inter-School Subroto Mukherjee Cup Football Tournament 2022 ba la pynïaid da ka ophis jong u District Sports Officer, South West Khasi Hills District hapoh madan Artificial Turf, MDSA, Mawkyrwat.
Haba phai ha ka jingïalehkai, ka Mawlieh Upper Primary School ka la ïoh ban jop pyrshah ïa ka Forsythla Secondary School da 1 – 0 kol ïa kaba la thep da u Wanlambok Iawphniaw ha ka minit kaba 19.
Katba ka Jakrem Presbyterian Higher Secondary School pat ka la jop ïa ka Thiepdiengngan Keniong Presbyterian Secondary School da 7 – 0 kol ïa kaba la thep ïa ki kol da u Banraplang Dkhar ha ka minit kaba 12 bad 47, na u Hubert Jyrwa ha ka minit kaba 21 bad 36, na u Wallamjingkyrmen Wahlang ha ka minit kaba 27, na u Kynjailang Kharwanniang ha ka minit kaba 34 bad na u Edelbert Lyngkhoi ha ka minit kaba 41.
Kumta ka jingïakhun phainal ka ban long kum ka dak ban pynhap pyrda ïa ka South West Khasi Hills District Level Inter-School Subroto Mukharjee Cup Football Tournament 2022 kan long ha ka 7 tarik mynta u bnai hapoh madan Artificial Turf, MDSA, Mawkyrwat ha kaba ka Rangthong Christian Higher Secondary School kan ïa khun pyrshah ïa ka Lyngdoh Wanniang Secondary School, Marshillong jong ki khynnah kynthei kiba hapoh ka 17 snem ha ka por 9:30 mynstep, ka Mawlieh Upper Primary School bad ka Jakrem Presbyterian Higher Secondary School jong ki khynnah shynrang kiba hapoh ka 14 snem ha ka por 11 baje mynstep bad ka Balang Mawlangwir Higher Secondary School pyrshah ïa ka Mawjaraiñ Presbyterian Secondary School ha ka por 2 baje nohphai sngi.
Ka ophis u DSO, South West Khasi Hills District ka khot sngewbha ïa baroh ki paidbah riew ieit phutbol, ki khynnah skul bad ki nonghikai ruh ba kin wan sakhi ïa kane ka lympung ïalehkai kynjathol jong ki khynnah skul khnang ba kan long ka jingaimynsiem na ka bynta jong ki.
