Ka ilekshon MLA ka ban sa long ha u snem 2023 sha ka Ingdorbar Thawaiñ ka Jylla kan long ka elekshon kaba u paidbah u dang buh ïa ka jingïakylli haduh kine ki sngi, hato ki seng riewlum ki don neem ka jingïatylli paramaki ban ïakhun pyrshah ïa ki bor bakhlaiñ jong ki seng saiñpyrthei kiba la seng nongrim ha kane ka jylla Meghalaya.
Kine ki ar tylli ki seng saiñpyrthei kiba la ïatreilang hapoh ka shatri rieh slap jong ka Regional Democratic Alliance (RDA) ha ka elekshon MLA 2018 ki la ïoh pynban ïa u soh uba jew ha kaba ka UDP ka la jop tang 6 ngut ki MLA katba ka HSPDP ka la jop tang 2 ngut ki MLA. Ki ramhah ka UDP kiba la don jingkyrmen bha ban jop naduh u Bah Paul Lyngdoh, uba long u Working President, u Dr. Jemino Mawthoh uba long u General Secretary ki la liem lyndang lut ha ki kyrtong jong ka Seng Congress. Haba phai pat sha ka HSPDP wat u President ba rangbah ha kato ka por u Bah Ardent Miller Basaïawmoit u la liem lyndang bad ym tang katta wat ka HSPDP kaba la suhthied bha ha West Khasi Hills District ka la shah syllad naphang ha ka NPP bad ha ka Congress. Ha Nongstoiñ Constituency kaba ju long ka ktem ba khlaiñ jong u Sing ka la shah pynpra phom ha ka Tsumani jong ka National Peoples’ Party (NPP) kaba la ïoh haduh 20 ngut ki MLA ha ka elekshon MLA sha ka Ingdorbar Thawaiñ ha u snem 2018. Ym tang katta, wat u President uba mynta jong ka HSPDP, u Bah KP Pangniang ruh u la shah pynliem lyndang kat haduh ba um shym la lah shuh ban dang khie khlieh ha ka elekshon MDC kaba la long ha u snem 2019.
U paidbah u dang kynmaw kyndiang ïa ki jingkren jong u Bah KP Pangniang uba la shimti kum u President jong ka HSPDP ba ka jingïatrei lang hapdeng ka HSPDP bad ka UDP kan long tang hadien ba la kut ka Elekshon bad lada donkam ban thaw ïa ki Executive Committee kiba thymmai ha KHADC lane ha JHADC.
Katkum ka jingkren jong une u MLAbarim ka HSPDP ba ka HSPDP kan ïakhun la ka jong ka jong ha ka ilekshon MDC ka ban long ha u Rymphang 2019 ha KHADC bad JHADC ka la buh jingkylli hato lano ka jingïatreilang bad ka jingïatylli ki seng riewlum kan kut noh haba ha ka elekshon MLA ha u snem 2018 ki dang don ka jingïatehlok (seat sharing) hapdeng ka HSPDP bad ka UDP.
Katkum ka jingïohi ha ka elekshon MLA ha u snem 2018, ka jingïatreilang hapdeng ka UDP-HSPDP kam shym la wanrah ïa u soh uba thiang da ka jingangnud ba kin ïohbat ïa u lakam synshar hadien ka Elekshon, hynrei ki shu long pynban tang ki nongai jingkyrshan bad ki rongser ha ka Sorkar Meghalaya Democratic Alliance (MDA) ba la ïalam da ka National Peoples’ Party (NPP) kaba la jop bun paid haduh 20 ngut ki MLA ha u snem 2018. Ym tang katta, wat ka Peoples Democratic Front (PDF) kaba long ka seng saiñpyrthei bathymmai kaba jop saw ngut ki MLA ka la hap ban ai jingkyrshan lang ïa ka Sorkar MDA bad ïatreilang bad kiwei pat ki paralok.
Ban ïakren ïa ka jingïatylli jong ki seng riewlum kan ym poi shano shano ruh namar u paidbah u dang kynmaw haba u Bah Paul Lyngdoh, uba long u nongsaiñdur ïa ka Khun Hynñiewtrep National Awakening Movement (KHNAM) u la pynbna ban pynduh pyndam ïa kane ka Party da kaba leit pynïasoh ïalade sha ka UDP, hynrei u Bah Adelbert Nongrum bad u Bah Pyndapborthiaw Saiborn kiba la ieng pyrshah ïa kane ka jingthmu jong u Bah Paul Lyngdoh bad ïai bteng ban pynneh pynsah ïa kane ka Party kat haduh ba u Bah Adelbert Nongrum u la jop ïa ka elekshon MLA na North Shillong Constituency.
Ïa mynta hi ka KHNAM kaba la jop saw ngut ki MDC ha ka Elekshon 2014 mynta ka don sa tang ïa u Bah Adelbert Nongrum hadien ba u Bah Latiplang Kharkongor, u Bah James Ban Basaïawmoit bad u Bah Process T Sawkmie kiba la phet noh na kane ka Party ban leit pynïasoh ïalade sha ka PDF bad hadien kata sha ka Seng sha ka Congress. Ka jingïaryngkoh na kawei ka seng sha kawei pat ka seng ka la pynking janor ïa ki paidbah kiba shu long tang kum ki si samkhmut hakhmat ki lei san snem.
Ban ïohi hi ïa ka jingïatylli hapdeng ki sengriewlum ha kane ka jylla kan long kaba jwat bad kaba eh haduh katta katta namar ka jingrhah bor bad ka jingbuaid shuki. La donkam ïa ki nongïalam jong ki seng riewlum ba kin pyrkhat jngai lada ki kwah ban synshar hi dalade ïalade ban ïakhun pyrshah ïa ka bor ba khlaiñ ka National Peoples’ Party (NPP) kaba la khie khlieh kynsan bad sdang ban paw pyrthei ha ka Political Map jong ka ri India katba ka Congress kaba long ka seng saiñ pyrthei kaba la rim tam ha ka ri India bad ha ka jylla Meghalaya ka la jah kyrteng syndon na ka Ingdorbar kaba don 60 ngut ki dkhot hadien ba ki 12 ngut ki MLA ki leit pynïasoh ïalade bad ka All India Trinamool Congress bad ki san ngut kiwei pat kiba dang sah ki la shah beh seng shipor na ka daw ba ki la ai jingkyrshan ïa ka Sorkar MDA khlem ka jingkynjoh ktien ïa ki nongïalam jong ka party.
