K a jingshim jingkitkhlieh jong ki Pulit ka Ribhoi District ban khynra bad ban talasi naphang ym tang ïa ki kali jong ki riewpaidbah hynrei wat ïa ki kali jong ki heh ki hain bad ïa ki kali ba la shong da ki nongmihkhmat paidbah bad ki ophisar ka la long kawei pat ka sienjam ka tnat Pulit ka la ïoh jingïaroh bha na ki riewpaidbah.
Naduh ba u SS Rathore u la shimti kum u Senior Superintendent of Police ka Ribhoi District u sngewthuh shai kum ophisar uba don ka jingkitkhlieh ban ïada ïa ka jingim jong ki paidbah ha shilynter ka surok National Highway-6 ha Ribhoi namar ka jingjia ba khah khah ki jingjia aksiden kiba lam sha ka jingduh ei ki mynsiem briew tang ka jingñiah kali khlemakor jongno re jongno.
Ha ki sngi bad ki taiew ba ladep la sakhi ba ka jingtalasi kali jong ki Pulit ha shilynter ka surokbah ki la don ruh ki briew kiba leh ïa ki kam bymman ban kit ïa ki jingdih pynbuaid bad kiba pyrshang ban phet na ka kti jong ki Pulit. La shem ba ki don ruh ki riewshim kabu kiba pyndait Siren ha ki kali ban ïoh ïaid baheh ha surok kumba la jia dang shen haba ki Pulit ki ïoh bat ïa u riewshimet uba pyndonkam bakla ban tah ïit ïong ïa ki kali rem dor bad buh ruh sa ki nongsynran ba kit suloi ban ak baheh ha surok.
Ïa kane ka nuksa jong ki Pulit ka Ribhoi ladei ban bud ruh sha kiwei kiwei ki district jong ka jylla khnang ban khanglad ïa ki riew shim kabu kiba wan rung tuh shapoh ka jylla, ban khanglad ïa ki nongkhaii drok kiba ju shalan ïa u drok sha kane ka jylla Meghalaya, ban khanglad ïa ki kynhun pyntriem bad ïa ki mynder ri kiba wan phetrieh sha ka Jylla Meghalaya.
Kumba ka Sorkar ka la buh thong hapoh ka DREAM mission ban ïakhun thma pyrshah ïa u drok, ka dei sa tang kane ka lad kaba ka tnat Pulit ha ki District bapher bapher ban ïatreilang bad ki Village Defence Party (VDP) kumba ka Sorkar ka la pynkupbor ban talasi ïa ki kali manla ka sngi ha surokbah khamtam ha East bad ha West Jaiñtia Hills District namarba ka surokbah National Highway-6 ka dei ruh u budlum uba pynïasoh ïa ka leit ka wan jong ki kali sha ki jylla bapher bapher ha ka thaiñ Shatei Lammihngi.
Na ka por sha ka por la sakhi ba ki Pulit ka East Jaiñtia Hills District ki ju ïoh kurup ruh ïa u drok na ki nongkhaii kiba pynrung tuh ïa u drok nabar ka jylla khamtam na ka jylla Mizoram, Manipur bad na Silchar. Jin lada ki Pulit ka East Jaiñtia ryngkat ka jingïatreilang bad ki VDP kin talasi kali manla ka sngi ha Surokbah National Highway-6 manla ka sngi kumba leh ki Pulit ka Ribhoi District khlempep ka East Khasi Hills District kan lait luid na u drok wat lada kam long shi spah na ka shispah.
Kam don jingeh lada ka tnat Pulit ka don ïa ka mon haba ka Sorkar hi ka la shimkhia ban kitkhlieh halade ban ïakhun thma pyrshah ïa u drok.
Ym tang sha ki District kiba don shabar ka Sor Shillong hynrei wat ha East Khasi Hills District ruh ki Pulit ki hap ban pynjur ïa ka jingtalasi kali khnang ban khanglad ïa ki nongkhaii tuh kiba ju khaii mar tuh bad khaii masi lyngba ka khappud sha ka ri Bangladesh.
Jin lada ka tnat Pulit ha baroh ki district ka jylla baroh kawei ki peitngor manla ka sngi kan buh hi ïa ki paidbah ha ka jingshngaiñ. Ka jingmih hi ki kynhun sengbhalang sha surok ka long hi ka daw ba ki tnat treikam ka Sorkar lehse ki bunkam palat ne ïoh lehse ki duna nongtrei ban tuklar ïa ki kam kiba sha surok nalor ba ka kam ka la ban khia lypa ïa ki hapoh ki ophis treikam.
Lada ki Pulit ka Ribhoi District ki lah balei kiwei pat ki bor Pulit ha kiwei ki District kim lah? Ka shong eh ha ka jingshim jingkitkhlieh jong ki ophisar kiba la shah pynkhamti ïa ka kam.
