Nongstoiñ, Naitung, 5: Kum ka jingsngewlem ïa ki para nongshong shnong kiba shem lanot bad kiba ïakynduh jingeh ha ka longïing longsem, ki dkhot jong ka HYC, Nongstoiñ circle hapoh ka jingïalam u samla Lumlang Kharsyiemlieh ki la ai jingïarap da u khaw sha kawei ka longïing ha ka shnong Domkohsam.
Ka jingai jingïarap jong ka seng sha kane ka longïing ka dei hadien ba ki la ïoh jingtip ba u kpa jong ka longïing u la shitom la bun snem bad u la shu thiah ha jingthiah nalor ba ka dei ka longïing kaba duk haduh katta katta kaba tang ban leit pah sumar ha Hospital ruh kim don lad. Nalor kata ki khun ki dei kiba dang rit bad ym pat don kiba lah ban leit bylla na ka bynta ban kyrshan ïa ka ïing ka sem bad bunsien ki hap ban shu shah thngan. Kumta na ka liang ka seng ka la pyrshang katba kot la ka bor ban kyrshan lem ïa katei ka longïing.
